Serchhip bial tan theihtawp chhuah hi Politics-a ka luh chhan - PC Tlansanga
Serchhip constituency-a Assembly by-election neih tura Indian National Congress (INC) candidate tur PC Laltlansanga chuan, politics-a a luh chhan ber chu Serchhip bial tana theihtawp chhuah a nih thu a sawi.
PC Laltlansanga hian nimin khan Serchhip Press Club-ah thuthar thehdarhtute a kâwm a, "Politics ka luhchilh aṭangin Serchhip bial hmasawnna atan theihtawp chhuah ve ka châk ṭhin a, chu chu active politics ka luhchilh chhan ber a ni," a ti.
Mihring duh dan leh ruahmannate chu a hlawhtling zung zung lo a, ṭhangkhat lian zet nghah a ngai tih sawiin PC Laltlansanga chuan, "Tunah chuan Pathianin kan party kaltlangin tihhlawhtlin theihna hun ṭha min siamsak taah ka ngai a, Serchhip bial tihhmasawn nan theihtawp chhuah turin phûr takin ka pên chhuak a ni," a ti a; an party hotute chungah a lawm thu a sawi.
INC candidate tur chuan, Serchhip biala MLA hun rei tak ni tawh Lal Thanhawla sûlhnu chhuia candidate a ni tur chu a phûr thu sawiin, "Serchhip bial hmasawnna atana hma a lak tawh zozai leh a hmachhawp, a tihhlawhtlin hman lohte tihhlawhtlin a nih theih nan Congress party-in candidate atana min ruatna hi lawm takin ka pawm a ni," a ti a; Serchhip bial hmasawn nan thawhpuiah bial mipui a sáwm.
PC Laltlansanga chuan, by-election-a a khingpui turte chu an hrawl dun hle tih sawiin, "Kawng tam taka ka tluk loh turte an ni ang. Mahse, ka khingpui tur pa ropui tak tak pahnihte ai hian Serchhip bial mipui ka hre chiang a, an ni pahnih ai chuan in tan ka ṭangkai zawk ang," a ti.
MLA-ah thlan tlin a nih chuan, mipui náwlpui, mirethei leh harsa zawkte tan ban phâk MLA nih a tum thu sawiin PC Laltlansanga chuan, "MLA fund kum thum hman tur la awm, cheng nuai 450 hi miretheite tan a ṭangkai thei ang berin hman kan tum. 'Poor fund' (mirethei pual) kan siam ang a, damlo, Aizawl leh hmunpui panpui ngai, sum harsatna avanga damdawi-in lian pan thei lote tan kan hmang ang," a ti a; a thil tumte a tihlawhtlin theih nan thlang tling turin Serchhip bial mipui a ngen a ni.