AMC councillor tharte lak luh a ni. 'Bawlhhlawh paih dan zir chian a ni dawn' - Mayor

February 16, 2021-a Aizawl Municipal Corporation (AMC) inthlana thlan tlinte chu nimin khan AMC meeting hall-ah councillor atan Aizawl district magistrate R Lalramnghaka'n rinawmna thu tiamtirin a la lut. Mayor thar Lalrin­enga Sailo chuan, bawlhhlawh paih dan an zir chian dawn thu a sawi.

AMC councillor atana mi 19-te lak luh an nih zawhah Aizawl District Magistrate chuan mayor leh deputy mayor inthlan a buatsaih. Mayor atan Ward-I aṭanga thlan tlin Lalrinenga Sailo chu Ward XI councillor H Zonunsanga'n a rawt a, Ward XVII councillor David Zohmangaiha'n a thláwp. Chuhtu dang an awm loh avangin Lalrinenga Sailo chu mayor atan lak luh a ni. 

Deputy mayor atan Ward XII councillor R Thanglura chu Ward IV councillor Laltlanzova Khiangte-in rawt a, Ward-XIII councillor Lalfakzuala Chenkual-in a thláwp. Chuhtu dang an awm loh avangin R Thanglura chu deputy mayor atan lak luh a ni.

Mayor leh deputy mayor lak luh an nih hnuah Lalrinenga Sailo chuan executive councillor atana a thlan mi pali - Lalringliana (Ward-II), Laltlanzova Khiangte (Ward-IV), B Lalawmpuii (Ward-IX) leh H Zonunsanga (Ward-XI) te hming chu Aizawl District Magistrate hnenah a thehlut a, lak luh nghal an ni.

AMC councillor lak luh inkhawmah hian UDPA changtu deputy chief minister Tawnluia, minister Dr R Lalthangliana leh Aizawl khawpui chhunga MLA-te an tel.

Aizawl mayor Lalrinenga Sailo chuan thuthar thehdarhtute zawhna chhangin, SIPMIU-in Solid Waste Managment Centre chu AMC hnena a hlàn dawn nia a hriat thu a sawi a, "A huphurhawm rualin a phûrawm khawp mai. Theihtawp kan chhuah dawn a, SIPMIU nen kan inhlan chhawn vel laia harsatna deuh a awm a nih pawhin mipui hriatthiamna ka ngen lâwk a ni," a ti.

Lalrinenga Sailo chuan, bawlhhlawh paih chungchangah a hma aia felfai zawka kalpui dan an ngaihtuah dawn thu sawiin, "A hautak deuh a nih pawhin tun aia felfaia kal dan tur kan zawng dawn a, zir chian erawh a ngai ang," a ti a; Tuirial ni lo, hmun dangah pawh bawlhhlawh sawngbawlna siam tura hma an lak nghal tur thu a sawi.