Congress hruaitute'n ngaihdam an dil

Congress party hruaitute chuan nimin khan Lunglei Press Club-ah thuthar thehdarhtute an kawm a; kum 2008 aṭanga 2018 thlenga sorkarna an chan laia kohhran leh tlawmngai pawlte duh loh thil an tihah ngaihdam an dil a, mipuite'n sorkar tura an koh leh hun atan an inbuatsaih thu an sawi.

MPCC general secretary Lal Thanzara chuan, kum 10 an sorkar chhungin an intiam angin NLUP an tihlawhtling tih a sawi rualin, na taka an tlâk thu a sawi a, "Kan tlâk chhante kan inen lêt a, kohhran leh NGO-te duh loh, zu permit kan pek kha kan tlak chhan bulpui ber a ni tih kan hmu. Pathian leh mipui zarah sorkarna min pe leh a nih chuan zu permit kan pe tawh lo ang, kan hotute'n an ti. Kan lo tihsual tawhah Mizorama kohhrante leh NGO-te chungah ngaihdam kan dil a ni," a ti.

Lal Thanzara chuan, AMC inthlanah an chak lo tih an hriat thu sawiin, "Aizawlah MLA bial kan nei lo a, heti chungin AMC bial pahnihah hnehna kan chang," a ti a; ZPM-te'n inthlanah final lut anga an insawi chu, quarter final an lut dawn chauh zawk nia an hriat thu a sawi.

MPCC PAC member Lalsawta chuan, Congress party-in kalphung an neih pakhat chu, inthlanpui neih hnuah sawisel an nei ngai lo tih a sawi a, "Tute emaw chuan inchelhbehna atan chhuanlamte siamin EVM-te an mawh a, keini chuan mipuiin min hnâwlah kan ngai mai ṭhin," a ti.

Lalsawta chuan, Mizoram Chief Minister-in pa chan chang loin thu a sawi ṭhin nia sawiin, "Mipuiin a sawi ve mai mai a ni an tihsak a, kan CM thil sawi danah hian kan ram mipuite hi an ngaihtuahawm ta hle. CM ber thusawi hi mipuite tihlimtuah a chang mek a, hei hi hlimna ṭha a ni lo a, ram leh mipui tana thil ṭha leh hlimna dik ngaih pawimawh a ṭul zawk a ni," a ti a; ZPM-te chu mi ṭha báwm siam tum an nih thu a sawi.

Mipui thutlukna avanga Congress party tlâkna an pawm tih sawiin Lalsawta chuan, "Mipuiin sorkar leh tlaka min ngaih theih nan hna kan thawk a, bul kan ṭan leh a ni. Kan tlakna aṭanga insiamṭhain, Congress party chu a insangmar chho leh a ni," a ti.

MPCC hruaitute'n press mite an kawmnaah hian Ronald Sapa Tlau leh Joseph Lalhimpuia te pawhin thu an sawi a ni.