MNF-in Mizo National Day an hmang

MNF party chuan nimin khan an pisa, Mizo Hnam Rûnah Mizo National Day vawi 55-na an hmang a; MNF vice president Lalthlengliana'n kaihruaiin, vice president Vanlalzawma leh trea-surer K Vanlalauva ten thu an sawi.

Vanlalzawma chuan, Mizo National Day chu hnam thinlung inzirtir zelna atan hman tura an rel thu sawiin, "Hetiang hi party dangin an nei ve lo. Tunah independent hmu lo mah ila, nakinah kan la hmu mai thei, engtin nge kan hmuh ang tih erawh sawi lâwk theih pawh a ni lo," a ti.

Mizo ram leh hnam mai ni lo, sakhua a dam theih nan mi hmasate'n independent puangin ke an pên tih sawiin Vanlalzawma chuan, "Mipui ngenna avangin inremna siam a ni a, vawiin thlengin India rama inremna ṭha ber a la ni

reng. Kan mi hmasate'n kum 55 kal taa ram leh hnam leh kan sakhaw dam nana ke an pên kha mi pangngai chin chuan ropui an ti vek a ni," a ti a; MP a nih laiin Delhi-ah pawh MNF mi leh sa a ni tih an hriat chuan an zah em em zel niin a sawi.

Vanlalzawma chuan, party thilah inbei ṭhin mah se, hnam thilah chuan Mizote lungrualna a la ṭha reng tih sawiin, "Hnam thinlung pu party awmchhun kan nih avangin he hnam lungphum, hnamin a paltlang tawh leh hnam rilru hi ṭhangtharte hrilh fo an ngai a ni tih hre thar ang u," a ti.

K Vanlalauva chuan, Mizo National Day chu MNF-in independence a puan ní, March 1, 1966 champhaah hman ṭhin a nih thu sawiin, "Kan ni pawimawh zinga a bul ṭanna a ni a, inremna kan neih aṭangin Mizo National Day tia thlak a ni," a ti a; Mizoram leh Mizote chu Mizo lalte hnuaia awm an ni ṭhin a, British-in Mizote ráwn loin India, Pakistan leh Burma-ah an ṭhen hrang niin a sawi.