COVID-19: Mizoram dinhmun Chhuahtir tawh zat 99.39%

February 28, Pathianni khan Mizoramah swab sample 233 endik ni mah se, Covid-19 vei hmuh chhuah a ni lo. Nimin khan hripui laka fihlim tawh mi pathum chhuahtir an ni a, Covid-19 kai hmuh tawh mi 4,423 zinga chhuahtir tawh chu mi 4,396 (99.32%) an ni.

Pathianni khan TrueNAT-PCR hmangin Hnahthial district-ah sample 12 endik niin, RAT hmangin district parukah sample 221 endik a ni a; ZMC laboratory-ah sample endik a ni lo.

Nimin khan hripui laka fihlim tawh mi pathum chhuahtir an ni a; Aizawl, Lunglei leh Champhai aṭangin mi pakhat ṭheuh an chhuak a ni.

Mizoramah Covid-19 vei mi 4,423 hmuh chhuah a ni tawh a, mipa 3,228 leh hmeichhia 1,195 an ni. Nimin tlai dar 5 thleng khan mi 4,396 (99.39%) chhuahtir an ni tawh a, mi 10 (0.23%) thi tawhin, enkawl mek mi 17 (0.38%) an awm.

February 28, 2021 thlenga Mizorama swab sample endik tawh zat chu 2,32,293 a ni a, chu'ng aṭanga Covid-19 positive mi 4,423 chu 1.90% a ni. Hripui vei hmuh tawh zinga mi 2,109 chu Mizo­ram chhunga kái chhâwng an ni a, mi 2,314 chu Mizoram páwn aṭanga an rawn luh hnua hmuh chhuah an ni thung.