Budget pharh tâkah MNYF an lawm

MNF party ṭhalaite chuan thuchhuah siamin, Finance enkawltu chief minister Zoramthanga'n nimina kum 2021-22 Mizoram budget a pharh tâkah leh kum hmasa aia budget punna 2.83% a ni chu lawmawm an tih thu an tarlang.

MNYF chuan, CM Zoramthanga'n kum 2021-22 budget a pharh chu cheng vbc. 10366.32 a ni a, kum 2020-21 budget cheng vbc. 10081.01 aia a punna chu 2.83% a ni tih sawiin, "Kum kal meka kan budget-ah cheng vbc. 1185, budget pumpui aṭanga 29.86% hmuh a ni lo a, uiawm tham tak a ni. Chuti chunga hmasawnna hna hrang hrang thawh a ni thei te, sorkar hnathawkte hlawh pek a la ni hram hramte hi Finance Minister tawnhriat nei ṭha leh sum enkawl thiam kan neih vang a ni," an ti.

MNF ṭhalai tarlan danin, kum 2021-22 budget-ah sorkar inrêlbàwlna atana sum hman tur Revenue Expenditure chu cheng vbc. 9261.39 niin, budget pum aṭangin 82.67% a ni a; hei hi kum 2020-21 budget-a Revenue Expenditure vbc 9021.85 (84.20%) aiin a hniam. Hmasawnna hna thawhna tur Capital Expenditure vbc. 1932.50 chu budget pumpui aṭangin 17.33% a ni a, kum 2020-21 budget-a Capital Expenditure vbc. 1693.15 (15.80%) aiin a tam zawk.

MNYF chuan, sorkar inrêlbàwlna senso tlahniama hmasawnna hna thawhna tur pung hi ram tana thil lawmawm tak a nih thu sawiin, "Budget ṭha tak pharhtu kan Finance Minister Pu Zoramthanga kan chhuang a, MNF sorkarin ram hmasawnna hna a ngaih pawimawhzia a lang chiang hle," an ti.

Budget hmasaa dah tawh anga tun budget estimate-a MNF returnee-te tana cheng nuai 500 dah a ni chu MNF sorkarin zalenna sualte a ngaihthah lohzia lantirtu a nih thu MNYF chuan an tarlang bawk.Budget pharh tâkah MNYF an lawmBudget pharh tâkah MNYF an lawm