Pathian chakna rinchhanin kan hmachhawn dawn - ZPM Vice President

ZPM vice president Dr Kenneth Chawngliana chuan, Serchhip biala Assembly by-election awm turah an elpui party-te'n therhlo chi hrang hrang an leklam viau a nih pawhin, Pathian chakna rinchhanin an hmachhawn dawn tih a sawi.

Nimina ZPM pisaa inkhawmah thu sawiin Kenneth Chawngliana chuan, "By-election awm turah hian kan elpui party-te'n therhlo chi hrang hrang - zu, pawisa leh dâwt an leklam viau mai thei a, hetiang hi an leklam leh a nih pawhin, Pathian chakna rinchhanin kan hmachhawn dawn. Ṭawngkam ṭha hmangin ram kan hruai a, tih tak takna tel loin, chu chuan tun hi min hruai thleng a ni. Keini chuan hruaitu ṭha tak kan nei a, a kaihhruaina hnuaiah Zoram thar kan siam dawn a ni," a ti.

Dr Kenneth Chawngliana chuan, ZPM-in auhla 'Kalphung thar, mipui sawrkar' tih an neih thu sawiin, "Tunah hian he kalphung thar kalpui dan tur hi mithiam rualte nen kar tin kan sawiho a, kan phûr em em. ZPM tan káwl a êng ṭan a ni," a ti a; Serchhip biala by-election neih tur chu kum 2023 inthlanpui hriltu a nih avangin ṭhahnemngai taka ZPM candidate vote turin mipui an sáwm.

ZPM Vice President chuan, AMC inthlan result-ah ZPM chu an lâwm thu sawiin, "Kan vote percentage pawh a sang em em a ni. Inthlan chhungin kan party mi leh sate an thawkrim em em a, party ṭan bik nei lote'n nasa takin min pui bawk tih kan hriatin kan lawm hle a ni," a ti.