MJA leh AR-in Media Conclave buatsaih

MJA, Serchhip district leh 8th Assam Rifles-te chuan nimin khan Serchhip Assam Rifles Club-ah Media Conclave an buatsaih a; MJA member 10 leh AR officer-te an tel.

8th AR commandant Col. J Mutum chuan, ramri vênna hna an thawhnaah tualchhung mite nen inkungkaihna ṭha neih chu an tum pakhat a nih thu sawiin, chumi tur chuan mipui tan thil tam tak an tih thu a sawi a; ṭhalaite'n hna an neih theihna turin hma an lâk ṭhin thu te, zirna leh infiamna lamah tualchhung mite chawikâng tura hma an lâk dante a sawi a ni.

Serchhip MJA president Kapliana Pachuau chuan, Assam Rifles-in mipui tana hna tam tak an thawh tawhnaah lawmthu a sawi a; AR hnathawhte chu mipuiin an hriat ṭhin loh avangin, mipui nena inpawhna ṭha zawk a awm theih nan an hnathawhte media kaltlanga puangzar ṭhin turin AR hotute a chah.

Chanchinbumite zawhna chhángin 8th AR commandant Col. J Mutum chuan, Myanmar leh India ramri, Champhai aṭanga Sangau thleng, km. 180-a thui an vil thu leh outpost pasarih an neih thu a sawi.

Tun hnaia khawchhak lama AR duty-te'n lirtheite an dapnaah mipui tana harsatna an siam ṭhina sawi chungchang zawhna chhángin Col. J Mutum chuan, bungraw karah ruihhlo leh rálthuamte zeh tel a nih ṭhin avangin, report an dawn chuan lirtheite dap lo thei an ni lo tih a sawi a; lirthei endikna tur kháwl an chah mek a, khawl a thlen hunah chuan harsatna tam tak a kian an beisei thu a sawi bawk.

8th AR Commandant chuan, dan loa ram dang aṭanga bungraw lak luh chungchangah, ramri aṭanga km. 16 chhunga awm chu Assam Rifles-te'n an man thei a, km. 16 páwn lama mi Customs leh state police-te kut a nih tawh thu a sawi.

Assam Rifles hotute chuan, kumin May thlaa sipai lâk rûnpui neih turah Serchhip district-a ṭhalai, sipai ṭang duhte tan a thlawnin registration tih theih a nih thu te, an camp-a RO office-ah zing dar 8-11 leh tlai dar 3-5 chhungin document pawimawhte kengin registration tih theih a nih thu te, Serchhipah boxing championship buatsaih an tum thu te, Zoar Deprive Children Home-a naupang pali chu boxing training tura an tirh tur thute an sawi bawk.