Kawng siam nan 2019-20 chhungin Cheng nuai 42,684.48 hmang tawh

Finance changtu chief minister Zoramthanga chuan ZPM member Lalchhuanthanga zawhna chhangin, kum 2019-20 chhungin kawng siamna atan cheng nuai 42,684.48 hman a nih tawh thu House a hrilh.

Chief Minister sawi danin, kum 2019-20 chhunga kawng siamna atana sum hmante chu state fund aṭangin cheng nuai 26,595.80 leh central fund cheng nuai 16,088.68 a ni a, a vaiin cheng nuai 42,684.48 a ni. Sorkar kum liam ta 2018-19 khan kawng siamna atan cheng nuai 76,153.22 hman a ni a, chu chu state fund cheng nuai 60,499 leh central fund cheng nuai 15,703.47 a ni.

ZPM member Vanlalhlana chuan, kum 2019-20 chhungin PWD-in restricted tender 29 an koh tawh thu sawi chhuakin, duhsak záwng hna pekna atan an tih leh tih loh a zawt a, "Restricted tender-in min pe la... tih application chu kan Chief Minister-in ṭha takin a recommend a ni," a ti.

CM Zoramthanga chuan, a recommend chu order a nih loh thu sawiin, "Mi kan recommend nasa lutuk. Mi an lokal a, recommend duh loh chi a ni si lo. Recommend a awm thúr a, an vaia pêk sèn chi pawh a ni lo," a ti a; restricted tender chu department-in mumal taka dilna an siam hnuah a ṭul a nih chuan koh a nih chauh ṭhin thu a sawi.

Tender pangngai koh a buaithlak chin a awm ṭhin nia sawiin Zoramthanga chuan, "A chháng hniam ber pek a ngai si a, chutianga pek chuan hna a chhe dawn lutuk. PMGSY-ah phei chuan hna pekin an thawk thei si lo a, black list an tam lutuk. Hna hmanhmawh leh mamawhna avangin restricted tender chhuah ṭhin a ni," a ti.

Chief Minister chuan, kawng siam lamah theihtawp an chhuah thu sawiin, "Kan buaina ber chu ruahtui a tla rei lutuk a, hna kan thawk an a, rin aiin ruahtui a tam leh ṭhin," a ti a; chak taka kawng siam hna thawh zel an tum thu a sawi.