Thenzawlah hnam dang dàwr kalh

Thenzawl Venghlun Branch YMA chuan an veng chhunga hnam dang (vai), dan loa dawr­kai nia an hriat dawr pathum chu nimin zing khan an kalh. YMA-in dawr an kalhte hi Thenzawl Tourist Lodge bula hnam dangte'n dan loa an siam nia an hriat hotel, thingpui dawr leh eichawp dawrte a ni.

Thenzawl Venghlun YMA hruaitute sawi danin, hnam dang dàwr an kalhte chu a neitu/enkawltu ILP nei mumal lo te, Mizorama an awm chhan tur (purspose of stay) ang ni loa awm leh, Mizo hming hawh leh anmahni sponsor-tu Mizo behchhana dan loa dawr siamte an ni. February 2020 khan MZP-te nen an enfiah tawhnaah, dàwr khâr turin chawlh­kar hnih chuang hun an pe a, hun tiam chhunga dawr titawp lote chu an kalh ta a ni.

Tun hnaiah Thenzawl Joint YMA chuan, Thenzawl khaw ṭhang mekah hnam dang dawrkai an awm loh nan YMA branch hrang hrangte'n khauh taka hmalak ni se, tiin an lo rél tawh a; dan loa hnam dang, hotel leh dawr siam pahnih/pathum vel an la awm niin an sawi.