Synod hruaitute leh MLA-te an inkawm Zu khapna dan a khauh dawn - CM

Inkhawm hi Synod moderator Rev. R Lalhmingthanga'n kaihruaiin, Chief Minister chuan zu khap chungchang thil kal laklawh tawh a awm thu a sawi a, "Kan tih theih chin kan ti a, Court-ah min khiang a ni. March 31, 2019 thleng licence nei, sum tam tak seng tawhte an awm. March 31 a tawp chuan tihzui kan tum tawh lo," a ti.

Zoramthanga chuan 'khawi ram mah zu tibo thei an awm lo' tite an awm ṭhin thu sawiin, "Rukruk, tualthah etc. pawh a bo chuang loa, chuvangin kan phalrai tur a ni lo. Theihtawpin tihbo tumin hma kan la ang a, a khapna khauh taka kalpui kan tum a ni," a ti a, theihtawp chhuahin sorkarin zu a do tur thu a sawi.

Kristian ram kan nih angin, sorkar pawh kohhrante nena inmila a kal a ngai tih sawiin Chief Minister chuan, "Kohhran hruaitute hi kan mamawh huna min kaihruaitu, remna nei tura min kai chhuaktu an ni. Remna a awm hnuah pawh inthlanna felfai a awm theihna atan MPF-in hma an la a, sorkar thianghlim a awm theihna atana min fuiha min ṭawngṭaisaktu chu kohhrante an ni," a ti.

CM Zorama chuan Rangvamual, Phunchawng leh Airfield Venga chengte chu eizawnna ngelnghet an siam sak tur thu sawiin, "A aia hlawk zawk eizawnna kan siamsak chuan zu zuar peih an awm kan ring lo," a ti a, pawisa sem lam ni loin, eizawnna ngelnghet insiamsak zawngin sorkar chuan hma a lak tur thu a sawi. 

Hlemhletna chungchang sawiin Chief Minister chuan, "Corruption kan do tlan theihna atan board 14 kan siam a, kohhran, NGO leh prominet citizen-te tel se kan ti a, kan vaiin i sorkar vek ang u kan tihna a ni ber. Chutiang anih chuan tu tan mah a corrupt tak tak theih lo ang," a ti. 

Synod aiawha thusawitu Synod secretary Rev. R Vanlalnghaka chuan ram roreltute leh kohhranhote inlungrual tak leh inhrethiam tawn taka thawkho tur nia an inhriat thu sawiin, "Nitin mamawh ngaihtuah leh relna kawngah roreltute mawhphurhna hi sang a, thlarau nun enkawlna kawngah leh chawmna kawngah kohhran mawhphurhna a thuk em em a ni," a ti a, taksa leh thlarau chu lak hran theih a nih loh thu a sawi.

Rev. R Vanlalnghaka chuan Synod chuan englai mahin zu zawrh a duh ngai lo tih sawiin, "MLTP Act hman a nih laiin khawlai nun a ralmuang a, tharum thawhna a tlem a, zu ruih avanga lirthei chetsualna pawh a tlem phah hlein kan hria. Sorkar phalnaa zu zawrh a nih chhungin thihpui an tam hle a, fahrah leh hmeithai lo pung ta hi kohhran chuan pawi a ti takzet," a ti.

Citizenship Amendment Bill, 2016 chu kan ram leh sakhaw tan a him loa an hriat thu sawiin Rev R Vanlalnghaka chuan, "Rajya Sabha-ah sawiho la ni rih lo mah se, hnuhkir a la nih loh avangin a nung reng a ni. Hetiang dan hlauhawm tak hi hnuhkir a nih theihna atan nasa zawka ṭan la turin kan beisei che u a ni," a ti.

Thusawitu dang, speaker Lalrinliana Sailo chu zu zawrh chungchang House-ah a pass pui theih loh thu sawiin, "Ka thawhpuite aiin Pathian leh kohhran ka hlau zawk. Kohhranin zu zawrh a duh loa, sorkar thar pawhin hma a la nghal a, kohhran nen ṭanho theih dan a awm tih ka sawi duh," a ti a, NGO leh sorkarin zu chungchanga action a lakte kohhranin a bawhzui ngam a ngem tih a ngaihtuah ṭhin thu a sawi.

Mizoram Synod hruaitute hian MLA atana thlan thar zawng zawngte hi Holy Bible leh momento an hlan vek a ni.