Hlawhtlinna ngel-nghet zirhona buatsaih

Cod Nerc leh Viswha Yuva Kendra (International Youth Center), New Delhi ṭang dun chuan nimin khan Synod conference centre-ah 'Youth & Sustainable Developement' tih thupuia hmangin ni hnih awh tur workshop an buatsaih a, MJA president Zonunsanga Khiangte-in a hawng.

Zonunsanga chuan Cod Nerc chuan ṭhalaite leh midangte pawh eizawn­na leh kawng ṭha a lo siamsak tawh ṭhin tih sawiin, "Work­shop pawh hi ṭhalai tam takin an ṭangkaipui leh dawnin ka hria. Ngel­nghehna chu tunlai ṭha­laiten kan thil mamawh tak a ni a, hrehawm tawrh te, teirei peihna te kan nei lo deuh em, kan ruh a no lutuk mah mah em, a tih theih. Ṭhalaite zingah vei em.em nei lo, chhungte tana ṭangkai chu sawi loh phurrit ni zawk engemawzat kan awm mek. Chutihlaiin 

ṭhalai fel tak tak, tum nei kan la nei ṭeuh hi a lawmawm a ni," a ti.

Ṭhalaiten hmasawnna tlo leh ngelnghet nei turin entreprenuership training neih uar a ngaih bakah, bul ṭanna tur sum neih a ngai tih sawiin MJA President chuan, "Heti lamah hian sorkarin ngaihtuahsak dan a dap thei lo a nih pawhin, bank loan inngaihtuahpuite tala hma a lakpui a ṭul. Taimakna, rilru nghet leh teirei peihte neih hmasak a ngai," a ti a, workshop-a telte chu midang tan hna tam tak siamtu nih tum turin a chah.

CoDNERC director B Lalchhanzova chuan tun hma aṭanga hetiang hun buatsaih an lo chak tawh tih sawiin, "A hlawhtlinna kan hmu thei ta hi a lawm­awm hle. An kalna kawnga mi entawntlak leh hlawhtling te, ṭhalaite tana zir tur kawhhmuh thei tur mithiamte leh mahni eizawnna kawnga mi hlawhtlingte leh zirlaite an titi ho dawn a ni," a ti a, sawm bik zingah university mithiamte, entrepreneurs, social worker, journalist, youth motivator, social reformer leh kohhran hruaitute an tel thu a sawi.