Runway a ṭhat tawh loh avangin Thlawhtheihna an service ṭha duh lo - Zoramthanga

Chief minister Zoram­thanga chuan Lengpui Airport runway a ṭhat tawh loh avangin, thlawhtheihna company-te Lengpuiah hian an service ṭhat duh loh phah thu a sawi.

Nimina Synod hruaitute leh MLA-te Synod pisa-ah an inkawmnaah thu sawiin Zoramthanga chuan, "Tuna kan buaina ber chu thlawhtheihna a ni a, state danga zin turin Silchar-ahte kal a ngai a ni. Ka hmuhchhuah thar chu thlawhtheihna runway khu a rei tawh lutuk a, resurfacing tih a nih ngai loh avangin thlawhheihnate an thlawk ṭha duh lo," a ti.

Chief Minister chuan Lengpui Airport runway a ṭhat loh avang hian thlawhtheihnate'n seat khata passenger an phur ngam loh thu sawiin, "A phurh theih chin aṭanga 80% vel chiahte an phur ṭhin a, chuvangin an hlawk lo a ni," a ti a, seat full-a an thlawh theih chuan company-te an hlawk avangin, an thlawh duh thu a sawi.

Airport runway siamṭhat hna chu thawk nghal tura PWD-te a hriattir thu sawiin Chief Minister chuan, "A rang a ranga kan tih loh chuan kan buai tawh. Pawisa awmsa cheng vbc. 11 a awm a, cheng vbc. 24 vel a ngai dawn niin an sawi. Pawisa chu a awm mai ang tiin zan lamah hna kan ṭan tir nghal char char a ni," a ti.