CAB pass a nih tak loh avangin MZP-in Pathian hnenah lawmthu sawi

MZP chuan, nimin khan an conference hall-ah The Citizenship Amendment Bill, 2016 Rajya Sabha-a pass a nih loh avanga Pathian hnena lawmthu sawina hun an hmang.

MZP president L Ramdinliana Renthlei chuan, CAB chu a lo chhuah tirh aṭangin NGO Co-ordination Committee angin an dodal ṭhin thu sawiin, "Nawrhna hrang hrang kan huaihawt ṭhin a, heti khawp a, nawrhna hrang hrang huaihawta hma kan lak lai pawh khan India sorkar chuan pass tumin hma a la ngar ngar a, kan theihna zawng zawngin hma kan la tawh a, hei bak hi chu a awm tawh lo a ni tiin mihring chakna hmang chuan kan bei dawng tawh a ni," a ti.

An beidawn tawh avangin 'Pathian i au mai ang u, Pathianah kan innghah mai a ngai ta e' an tih thu sawiin MZP President chuan, "Engkim chunga roreltu Pathian kan nei a lawm, heti khawp a Pathian kan au chunga he bill hi pass luih a nih chuan Pathian pawh hian Mizo ṭhalaite hi kan duh zawng tih a remtiah kan ngai anga, Mizo ṭhalaite hian kan tih tur kan ti ve tawh ang, kan ti a ni,"  a ti a, Pathian chuan a mite mangang au aw chu lo ngaithlain an dilnate a tihhlawhtlinsak thu a sawi.

L Ramdinliana chuan CAB dodalna kawngah a tibik leh thawhhlawk bik an awm chuang lo tih sawiin, "Mizoram chhunga NGO hrang hrang leh political party hrang hrang te chuan theihtawp kan chhuah tlang vek a, kan theihna kha a in ang lo mai a ni. Tumah in dem tur kan awm lo. CAB Rajya Sabha-a pharh a nih loh chhan chu kan zavaia kan thawhrah vek a ni a, kan zavaia Pathian kan biak ho rah a ni." a ti.

MUP vice president Lalhuapliana pawhin thu sawiin, "CAB lapse avanga mimal anga ṭawngṭai chu kan ni vek tawh ang, a huhoa lawmthu sawina hun remchang MZP ten an siam hi a lawmawmin, NGO hmalakna bakah MZP leh NESO hruaituten central India hruaitu CAB pass lo tura an lo zuk kal chilh kha a ropui bakah finna petu Pathian hnena lawmthu sawi tawngtai hi Mizo mipuite hian kan bat a ni," a ti a, MZP chu hnam issue -ah chuan a tak taka pen chhuaka a tawp thleng ngam a ni ṭhin thu a sawi.

Thusawitu dang MHIP president Saipuii chuan Zofate'n hnam leh ram pum angin hmalakna ropui tak tak kan lo nei tawh ṭhin thu sawiin, "Chung hunah chuan Pathian kan au thin, a tawpah Pathian hnenah lawmthu sawina emaw kan nei ṭhin lo. CAB lapse tak hnuah erawh MZP ten lawmthu sawina ṭawngṭairualna an siam ta hi MHIP chuan ropui kan ti. MZP ten central sorkar BJP thawhpui hrang hrangte CAB pass a nih loh na tur a hmin tuma central lam dawrna chang an hria kha Pathian in finna a pek vang a ni," a ti.