Sorkar laipui scheme hnuaia Hmalakna hrang hrang thlirho

Kolasib District Development Co-ordination & Monitoring Committee chu nimin khan DC conference hall-ah chairman, Lok Sabha MP CL Ruala leh co-chairman, Rajya Sabha MP Ronald Sapa Tlau hoin an ṭhukhawm a, sorkar laipui scheme hnuaia hmalakna hrang hrangte an thlirho.

CL Ruala chuan Lok Sabha term a lo tawp dawn tawh avangin atan chuan DISHA chairman anga hun a hman hnu­hnung ber anih tawh dawn thu sawiin, chairman thar an lo awm hun­ah pawh lungrual taka ram leh hnam tana thawk tlang zel turin a chah a, "Sorkar hnathawkte chu sorkar inthlak chang awm mah se, an danglam ve loh avangin an kutah district mai bakah Mizoram hmasawnna a innghah tlat," a ti.

Ronald Sapa pawhin thu sawiin, chairman kal chhuak tur CL Ruala ram leh hnam tan theihtawp a chhuah ṭhin thu sawiin, a kalzelna turah duhsakna a hlan.

Meeting-a tarlan a nih danin, Champhai district-ah hian MGNREGA hnuaiah kum 2018-2019 chhungin job card  holders 28,865 hnenah ni 82 inhlawhna  siam sak a ni a, hemi hun chhung hian cheng nuai 6139.41 hmangin hna 719 kalpui a ni. 

April 2017 aṭanga kalpui ṭan Pradhan Mantri Awaas Yojana-Gramin, PMAY-G (Rural Housing Scheme) hnuai­ah beneficiary mi 146 te hnenah insak ṭanpuina pek niin, in 127 sak zawh tawh a ni. 

Saubhagya Scheme hnuaiah a thlawnin electric eng district chhunga in 1854 ahte pek tawh niin, heng zinga 1083 hi Champhai Power Project Division huamchhunga mi an ni a, a dang 771 chu Khawzawl Power Project Division hnuaia mi te an ni. 

UD&PA hnuaia PMAY-U hmalaknain  Champhai khawpuiah in 2285 leh  Biate-ah in 164 sak tura pawm a ni a, first phase-ah hian Champhaiah in 898 leh Biate-ah in 52 te thlan an ni. 

National Health Mission hnuaiah July-December 2018 chhungin naupiang  909 an awm a, nausen thi 15 awmin IMR chu 16.50 a ni.   Nu nau chunga thi pahnih awmin MMR chu 220.02 a ni. A nawlpuia thisen test mi 4118 zinga  137 chu HIV positive an ni a,  kai thar za zela 43.06 te chu kum 25-34 inkar an ni.