Mipui vanga hlawh la kan ni - Kolasib DC

Nimin khan Kolasib DC Zoengsanga hoin, Kolasib khawmpui chhunga department hrang hrang hotute DC conference hall-ah an ṭhukhawm. DC chuan sorkar hnathawkte chu mipui vanga hlawh la an nih thu a sawi.

Kolasib DC chuan sorkar hnathawkte chu mipui rawngbawl tura chhawr an nih thu sawiin, "In dawrtute lakah hawihhawmna kan lantir a ngai. Rinawm taka hnathawh a pawimawh a, mipuite tana malsawmna thlentu kan nih theihnan office hna chauh ni lo mahni hma zawn ṭheuh­ah hmasawnna kawng hrang hrang dap ṭhin turin ngaituahna sen peih a ṭul,"  a ti.

Department zawng zawng huapin quarterly meeting neih a nih ṭhin tur thu sawiin Zoeng­sanga chuan, "Meeting-ah hian department-te'n an hmalakna an report dawn a ni,"  a ti a, officer-te chu financial year 2018-19 chhunga an department hmalaknate April chawhma lama thehlut vek turin a hriattir.

Kolasib DC chuan an district chu Mizoram kawtchhuah border area a awm a nih angin enge maw thil thleng thut thei reng a nih thu a sawi a, "In koh thut changte pawh a tam dawn a, hemi avang hian weekend ah pawh district administration aṭanga phalna la hmasa lo chuan tumah haw loh tur a ni," a ti a, department hrang hrangte chu theihtawp chhuah a thawhhopuiah a sawm.