Mizoram sorkar hi mipui chhan turin An chhe chuak tur a ni - PRISM

PRISM chuan thu­chhuah siamin, sipaiin Mizoram chhim lam Vaṭhuampui leh Zochachhuah mipui an hruai khawm nia sawiin, "Hei hi dik lo taka dan bawhchhiaa mipui tih­thlabarna a ni a, Mizoram sorkar hi mipui chhan tur in a che chhuak nghal tur a ni," an ti.

Hun enge maw lai atang khan Mizoramah sipai chet velna nasa tak awm nia ngaiin mi tamtak an thlabarin an chiai tawh ṭhin tih tarlangin PRISM chuan, "Hetianga mipui tamtak an chiai leh thlabar lai hian tun thlengin sorkarin thil awm dan dik a la puang chhuak lo a, thil awm dan dik tak puang chhuaka mipuite thlamuan turin sorkar kan phut a ni," an ti a, Mizoram sorkar chu sipaite chet vel dan dik tak mipuite hrilh turin an ngen.

PRISM chuan Va­ṭhuam­pui leh Zocha­chhuah khuaah chuan sipaiin mipui an hruai­khawm tih media-ah tarlan a nih thu sawiin, "Sipaite hian duh duha mipui hruaikhawm leh an pawnchhuahte khap turin thuneihna an nei lo. He thil thleng hi human rights bawhchhiatna a ni a, chuvang chuan mipui dikna chanvo humhalh a, human rights bawh­chhiatna a awm tawh loh nana hma la nghal tur in sorkar kan phut," an ti.

PRISM chuan chhim lama sipai chet dan chung­changah sorkar a che thuai lo a nih chuan, national leh international forum hrang hrangah thlenin hma an lak tur thu an tarlang.