State Sports Council an ṭhukhawm

Mizoram State Sports Council (MSSC) chu nimin khan Hawla Indoor Stadium-a MSS conference hall-ah Sports & Youth Services minister Robert Romawia Royte hoin an ṭhukhawm.

Sports Minister chuan member-te fin­chhuahna leh tawiawmna a mamawh thu sawiin, "Mizoramah sports lama hmasawnna a thleng chho zel a, kan hruaitu hmasate leh infiammite, kan ram hming tiṭhatute an chhuanawm hle. Olympics hmangin ram hrang hrang khawvel pum huapin kan intihsiak ṭhin a, India ram pum huapin National Games-ah kan intihsiak leh a, Khelo Youth Games kan nei leh a, hengah hian Mizo hming tiṭhatu kan nei chho zel a, a lawmawm hle," a ti.

Robert Romawia chuan intihsiakna reng rengah level sang inelnaa tel thei ringawt pawh an fakawm thu sawiin, "Qualifying level ngaih pawimawh a ṭul. Olympics leh National Games-ah mi tam zawk kan tel theih nana kawng pakhat chu Mizoram State Games neih a ni a, he mi neih hma hian district level-a intihsiakna pawh a awm thei a, ruahmanna siam tum a ni," a ti a, ruahmanna thar chuan infiamna chi hrang hrangah rahbi thar min kaitir a beiseiawm thu a sawi.

Meeting-ah hian kum tina MSSC in association hrang hrang hnena an pekchhuah thin, annual programme form-a dahbelh tur leh MSSC hnuaia hall leh field hman man tihdanglam chungchang an sawiho a ni.