KHAWTHLIR

National Programme for Control of Blindness & Visual Impairment (NPCB&VI), Lawngtlai district leh Eye Care Community & Research Centre, Aizawl ṭangkawp chuan nimin khan Lawngtlai CMO conference hall-ah 'Eye Camp' an buatsaih. Eye Camp atan hian senior eye specialist Dr KL Remsanga hoin Eye Care Community & Research Centre aṭangin doctor pariat an kal a, mi 350 vel mit endikin, mit naute paw (cataract) zai ngaite vawiinah a thlawna zai an ni ang.

Excise & Narcotics dept. chuan January, 2019 chhung khan zu zuar 82, zurui 19, rakzu litres 44126.9, zu bilhlai tin 7215, sap zu (um puitling) bottles 482 leh zu kaihhnawihah lirthei pakua an man.

Horticulture department chuan, nimin khan Serchhip Bazar-ah Thlai Thar Kut an buatsaih a, kut hawngtu Horticulture secretary Rodney L Ralte chuan huan neitute chu an thlai thar chhuah zat mumal taka chhin chhiah tura chahin, "Data felfai tak a awm chuan sorkar laipui dawr a ti awl sawt dawn a ni," a ti. Thlai Thar Kutah hian loneitu mi za chuangten an thlai tharte chu man tlawm zawkin mipuite hnenah an hralh a ni.

Lai Autonomous District Council (LADC) leh Chakma Autonomous District Council (CADC) hnuaia village council inthlan kumina buatsaih tur atan electoral roll hman tur chu Nilaini khan Lawngtlai DC conference hall-ah DC Shashanka Ala-in a tlangzarh. Lawngtlai DC chuan VC inthlan hun atan March12 ruahman chhin a nih thu leh February 22 hian State Election Commission (SEC) aṭangin tihchian a nih dawn thu a sawi.

Mizoram sorkar chuan thuchhuah siamin, sorkarin airgun licence pek chhuah chungchangah notification a siam thu sawiin, "District pariata DC-te chu Standard Operating Procedure(SOP) anga February, 2018 thlatir aṭanga July tawp thlenga airgun license pekchhuah thila district thuneitu an ni chhunzawm dawn a ni," a ti.