Ways & means hmanga RBI-a Sum pûk a ngaih CM-in ring lo

Finance changtu chief minister Zoramthanga chuan nimin khan Assembly Budget Session-ah ZPM member Dr Vanlalthlana zawhna chhangin, hriat loh thil kal thut a awm a nih loh chuan Mizoram sorkarin Reserve Bank of India (RBI) aṭangin Ways & Means hmanga sum a pûk a ngaih a rin loh thu a sawi.

CM Zoramthanga chuan, sorkarna an chan hnuah ṭum hnih Ways & Means hmangin RBI aṭanga sum pûk a nih tawh thu a sawi a, "Adjustment thil tak takah pûk a ni a, thil dik tâwk lo a awm em ni kan ti. A tûkah kan rùl leh nghal. Cash kan monitor reng avangin hriat loh lo kal thut a awm loh chuan pûk a ngai tawhin kan ring lo a, pûk loh hram kan tum," a ti.

Chief Minister chuan ZPM leader Lalduhoma zawhna chhángin, Mizoram Finance Commission-I a tàwp tawh thu leh Finance Commission-II din a la nih loh thu House a hrilh.

Zoramthanga chuan, Mizoram Finance Commission-I term chu March 31, 2015-ah a tàwp thu sawiin, "Finance Commission-II din a la ni lo. Finance Commission-I in recommendation an pek hi kum nga chhung atan a ni a, an recommendation hi March 2020 thleng huam a ni. Finance Commission-II innghahna ber tur 15th Finance Commission-in recommendation a la pe si lo a, din awmzia a awm lo. 15th Finance Commission recommendation awm hun leh Finance Commission-I recommend huam chin a tàwp hunah Finance Commission-II din a ni ang," a ti.