Panchayati Raj-ah thutlukna la awm lo

LAD minister K Lalrinliana chuan INC member Zodintluanga zawhna chhangin, LAD hnuaia village council-te chu India danpui siamṭhat 73-na zûlzuiin Panchayati Raj-a let turin sorkarah thutlukna a la awm loh thu House a hrilh.

K Lalrinliana chuan, VC-te Panchayati Raj-a let turin department chhungah ruahmanna a awm thu a sawi a, "Hemi atan hian Drafting Committee dinin, state dangte dinhmun pawh zir chian a ni. Amaherawhchu, sor­karah thutlukna a la awm lo. Tuna kan VC hman laiah hian siamṭhat ngai lai tam tak a awm. Tuna thingtlang inrêlbàwlna leh sorkarna hi tihchak a, thuneihna tam zawk pek a, development hna kalpui dan a felfai zawk nana tih a ni," a ti.

LAD Minister sawi danin, Panchayati Raj din tura hmalakna atan Drafting Committee vawi ruk an ṭhukhawm tawh a, concept note peih a ni tawh. Consultative meeting - political party zawng zawng tlawmngai pawlte pawh neihpui a ni tawh a, Panchayati Raj institution hmang state Sikkim leh Tripura zir chian tawh a ni a, Panchayati Raj institution-in a huam ve loh Nagaland leh Meghalaya te zir chian­ a ni tawh bawk.

Panchayati Raj chung­chang chu Cabinet-ah vawi khat sawiho a ni tawh a, tun atan chuan a ngai anga kal rih phawt a, village council inthlan zawh hnu lamah uluk taka en ṭhat ni se, an ti a ni.