LS MP C Lalrosanga a rawn haw MZP-in pawndum nen an lo hmuak

Mizoram Lok Sabha MP C Lalrosanga chu Citizenship (Amendment) Bill, 2019 (CAB) pass a nih hnuah a vawi khat nan nimin khan Mizoramah a rawn haw a; CAB thláwp zawnga vote a thlak avangin, a laka lungawi loh lantirna atan MZP-te'n pawndum nen Lengpui Airport-ah an lo hmuak. MNF mi leh sa eng emaw zatin airport-ah an lo hmuak ve bawk.

Lengpui Airport tuala in­khawm tawi buatsaihah MZP president B Vanlaltána chuan, Citizenship Amendment Act (CAA) an do avangin MNF-te'n an party an do anga an ngai ṭhin chu mak a tih thu a sawi a, "Nationalist party inti siin hetianga min ngai hi BJP nen an thawk dun tak tak em ni kan ti ṭhin. Khawi party tan mah kan thawk lo," a ti.

MZP President chuan, BJP thil tum 'Hindu lalram siam' chu a chian thu sawiin, "Hnam tlem tê kan ni a, kan ram leh hnam himna atan kan ṭan rual a ngai. Phak ang tâwkin a ṭha bera kan ngaih angin hma kan la a ni," a ti a; an châk vang leh hman êm vanga CAA do an nih loh thu a sawi. B Vanlaltána chuan, ram leh hnam tan theihtawp an chhuah zel dawn thu sawiin, "Thil ṭhaah chuan sorkar kan thlawp ang a, ram leh hnam tana ṭha lo tur chu kan do zel dawn. Kan MP pawh hian uluk takin ngaihtuah se, CAB hi a thláwpin ka ring lo," a ti.

North East Students Orga­nisation (NESO) finance se­cretary Ricky Lalbiakmawia pawhin thu sawiin, "CAA hi CAB a nih lai aṭangin hmarchhak state dangah Mizoram aia nasa zawkin an do a, khawiah mah a dotute an party do angin an ngai ngai lo. Sorkar kan do lo, CAB kan do," a ti a; party fuihpawrh an nih loh thu a sawi. Aizawl City College Joint Students Union (ACCJSU) president Lalruatpuia pawhin thu sawiin, Mizo pa chuan thutiam hlen an tum ṭhin tih a sawi a, "Kan MP hian inthlan hmain 'A tawp thlengin CAB ka dodal ang' a ti a. Pathian rawngbawltu ni ṭhinin pute rawng a báwl ta hi a ná kan ti. CAA hi a tàwp thlengin kan dodal zel dawn a ni," a ti.

Zirlaite hi Lengpui Airport tualah intlarin, C Lalrosanga chu CAB a thlàwp avanga an dem thu leh MP aṭanga báng tura an phût thutein an au rual a ni. Hetih lai hian, C Lalrosanga'n airport terminal a chhuahsan veleh MNF mi leh sate chuan dam reng tura an duh thuin an au rual ve bawk. MZP-in pawndum nen MP C Lalrosanga an lo hmuah avang hian Mizoram sorkar chuan Lengpui Airport-ah police tam tham tak a dah a, Lengpui panna kawng hmun ṭhenkhatah police-te duty tir an ni bawk. Buaina leh harsatna erawh a thleng lo nia thu dawn a ni.

MZP thuchhuah chuan, India ram hmun hrang hrangah CAB/CAA dodalnaa hmarchhak zirlai eng emaw zatin kut an tawrhna avangin India hmarchhak state hrang hrangah flag dum zar a ni dawn tih a tarlang a, "Mizoram chhungah pawh January 9, Ningani hian NESO leh MZP hmalaknain Aizawl khawpui lûn laiah flag dum târ a ni 

ang," a ti.