Dan loa vawk lak luh 121 man a ni

Mizoram police-te'n tun hnaiah Myanmar aṭanga dan loa Mizorama vawk lak luh 121 an man a, Bawngkawn Police Station-ah thubuai ziah luh a ni. Vawk lak luh mante zinga parukin vawk pûl hri Procine Reproductive & Respiratory Synodrome (PRRS) an vei tih finfiah a ni tawh a, 121 zinga 20 thi tawhin, Selesiha AH&Vety department hmunah phûm a ni.

Police hotute aṭanga thu dawn danin, July 26, Zirtawpni zing khan Seling dâiah pick-up 207 motor pasarih aṭangin vawk 82 man a ni a, motor-te chu Champhai district-a registration nei vek a ni. Dan loa vawk lak luhte man tur hian Aizawl SDO (Sadar) K Laltlawmlova'n Bawngkawn PS-ah first information report (FIR) a thehlut a, he mi bawhzui hian police-te chuan Seling daiah lo chângin an man ta a ni.

Seling dáia vawk an man neitu nia sawite chu Champhai khua leh a chhehvel vek an ni - Hmingthangvela s/o Kapliana, Venglai; Lalnunthara s/o Lalhmingmawia, Zotlang; Joel Vanlalthuthlungliana s/o Lalchhuanliana, Electric Veng; Lalrinzuala s/o H Remthanga, Venglai; Lalruatfela s/o Lalthantluanga, Bethel Veng; Vanlalawia s/o C Lalthanzauva, Bethel Veng leh, Lalthanzauva s/o Liantawna, Mualkawi te an ni.

Vawk 82-te hi Myanmar ramri Mélbûk aṭanga an rawn phurh a nih thu leh an vawk phurh zinga pasarih chu motor-ah an thih thu a phurtu motor khalhtute chuan an sawi. Selinga man vawkte chu AH&Vety department mithiamte'n an thisen an endik a, vawk paruk chuan PRRS an vei tih an finfiah tawh. Vawk thite chu Selesiha AH&Vety hmunah JCB ruaiin July 27, Inrinni khan an phûm nghal a, a la damte pawh Selesihah an enkawl mek. Vawk neitute chu court-ah hruai an ni a, bail theih an nih vangin court chuan bail-in a chhuah rih.

Bawngkawn police-te chuan an thu dawn bawhzuiin nimin zing khan Zemabawk dáiah pick-up 207 pathum hmanga Aizawla phurh luh tur vawk 39 an man leh a, vawk pathum chu kawngah an thi. Vawk thite chu a kawchhung paihin, rêp turin an dahṭha a, motor pakhatah chuan a chungah an rêp mek bakah, an chan darh sa pawh an dah a ni.

Nimin zinga man vawk 39-te chu a neitu hriat a la ni lo. Driver-te sawi danin, an vawk phurhte chu  Myanmar aṭang an rawn hrilh hunah an dahna tur an hre dawn chauh tih Vanglaini palai an hrilh. Driver-te hi Thangrokima s/o Chuhvela, Tuirial; Lalfakawma s/o Rotluanga, Champhai Bethel Veng leh Lalnienga s/o Laldinga, Champhai Venglai an ni a; motor-te pawh Champhai district-a register vek a ni.

Dan loa Mizorama phurh luh vawkte hi lian ṭha tak tak vek an ni a; Seling dáia an man vawk 82 chu Rs. 30,34,000 vel hûa chhût a ni. Nimin zinga Zemabawk dáia an mante chu cheng nuai 10 man vela chhût a ni bawk.

AH&Vety department joint director (incharge livestock health) Dr Lalnuntluanga chuan, Myanmar aṭanga dan loa vawk lak luh thite chu vawksa rêp ṭhinte hnenah an pe ang a, an hralh leh mai an hlauhthawn vangin AH&Vety hmunah an phûm tih a sawi. PRRS chu mihring tan a hlauhawm loh rualin, ran natna nasa zawk African swine fever a thlen palh an hlauh vangin uluk taka enfiah zel an tum thu Vanglaini a hrilh.

Police-te'n vawk an man chhan an sawi danin, District Magistrate-in IPC 188 hmangin Mizoram state páwn leh India ram páwn aṭanga vawk lak luh khap a nih vang a ni. AH&Vety minister Dr K Beichhua chuan, dan loa vawk lak luh chu an hriatpui loh thu leh an ngaimawh thu sawiin, police leh AH&Vety lama mithiamte pawh dan anga hma la tur leh ûm zui zel tura an hriattir tawh thu a sawi.