Dy. CM Tawnluia hmingṭhat khalh tumah MPCC-in Robert Romawia an puh

Mizoram Pradesh Congress Committee (MPCC) Media department chuan, deputy chief minister leh UDPA minister Tawnluia damloh laiin a hmingṭhatna tur chuhpuiah minister of state Robert Romawia Royte an puh. MPCC chuan UDPA department hmalaknaa puanzar tur niawm tak thilte chu UDPA minister ni si lo Robert Romawia'n a puanzar khalh ṭhin, tiin an puh bawk.

MPCC Media depart­ment hian July 27, Inrinni khan Aizawl Press Club-ah thuthar thehdarhtute kâwmin, Deputy Chief Minister hmingṭhatna tur MoS Robert Romawia'n a chuhpui dan nia an hriat an sawi a; an chairman Lallianchhunga chuan, "Pu Robert Romawia hian a kalkawnga awm apiang a pal bawrh bawrh mai niin a lang a, deputy chief minister Tawnluia pawh a dîm chuang lo," a ti.

MPCC Media hotute sawi danin, Sports minister Robert Romawia chuan July 5, 2019-ah High School Field-ah football field chhawng (elevated football ground) siam a nih tur thu social media-ah a puangzar a, chu chu sorkar laipuia Urban Housing hotute nena an sawiho hnua puang niin a insawi. Football field chhâwng siam a nih tur thu chu July 8-ah khan Mizo Hnam Rûnah a sawi leh a, July 22-a Mizoram State Sports Council meeting-ah stadium chhâwng siamna tur sum a awm tawh thu a sawi leh bawk.

Football field chhâwng siam an tum chu UDPA hnuaia Smart City project-a hna kal lai mek eng emaw zat sum hman a ni dawn tih sawiin Lallianchhunga chuan, "Hei hian UDPA changtu deputy CM Pu Tawnluia hmingṭhatna tur tam tak a lak ṭhensak dawn bakah, dem a hlawh phah hial dawn a, Pu Robert Romawia'n nasa takin a hmingṭhat phah thung ang," a ti.

Robert Romawia chu UDPA Minister hnenah lawmthu sawi mawlh mawlh tur a nih laiin, football field chhâwng siam tur thu a sawinaah reng reng Tawnluia hming a sawi lang ngai lo tih sawiin, "Hmingṭhatna zawng zawng têl tumin a tâl vel a ni," a ti a, mak an tih thu a sawi.

MoS Robert Romawia chu chief minister Zoramthanga fachuam nia sawiin Lallianchhunga chuan, "Sports Minister chet dan hian minister ṭhenkhatte kut phuar a nih zia leh chutiang karah chuan CM malsawmna dawngtute chet nat theihzia a tarlang chiang hle," a ti a; CM leh Robert Romawia inkungkaih thûk dan chuan sum lama hnung thak inhiahsak tawnna a awm a tirinhlelhawm zual tih sawiin, "Deputy CM tlân khalh tuma Pu Robert-a chêt vel dan en hian, MNF party-ah vangvat kaite hlutna a tlahniam ta hle a ni," a ti.

MPCC Media Chairman sawi danin, MNF sorkara Mizoram budget puitling hmasa ber enin, minister ṭhenkhatte kut phuar a ni dawn tih a lang a, minister ṭhenkhat chan department lian tak takah chuan sorkar hnathawk hlawh leh sorkar inrêlbâwlna pangngai bak, a taka hna thawhna tur Major Works head-ah sum dah a ni mang lo. Chu chuan minister-te hna thawk thei loa siam tum an nihzia a tarlang chiang hleah an ngai.

Minister ṭhenkhatte hnathawhna tur sum pek an nih miah loh laiin, Chief Minister chan Finance department-a ‘Untied fund’ an dah, amah tlawn thiam apiangte hnena sih chhuah turin cheng nuai 1,22,000 (major works, investment, loan & advances) zet dah a ni tih sawiin, Lallianchhunga chuan, "Hei hi Mizoram budget pumpui cheng nuai 10,87,200 aṭanga 11.22% a ni. Hei hian CM Pu Zoramthanga’n a minister rualte control a tum dan, amah tlawn thiam apiangte mal a sawm theih dan tur a tichiang hle," a ti.

Lallianchhunga chuan, Finance department-a untied fund chu budget session lai ngeiin Robert Romawia chan department pathum tan cheng nuai 1,100 pek nghal a nih thu a sawi bawk.