Ngopa-in Saitual dist-a beh duh

Ngopa RD (Rural Development) Block huam chhunga khaw awm zawng zawngte leh Lengteng Assembly constituency chhunga khaw eng emaw zat chuan, Saitual district-a awm an duh thu sorkarah an thlen.

Ngopa RD Block huam chhunga khaw hrang hrang - Ngopa, Khawkâwn, Mímbung, Pàwlráng, Hliappui, NE Khawdungsei, Chiahpui, Kâwlbêm, Teikhang, Changzawl, Saichal leh Hrianghmun khuate chuan Saitual district-a awm an duh thu, July 27, Inrinni khan chief minister Zoramthanga hnenah an thlen a; an thu thlen chu Lengteng bialtu MLA L Thangmawia leh Mizoram sorkara hotu dangte hnenah an pe bawk. An lehkhaah hian khaw 12-a V/C president-te'n hming an ziak a ni.

Ngopa RD Block chhunga khuate chuan, Champhai district-a an awm chhungin district headquarters panna kawng chungchangah harsatna an tawh nasat ṭhin thu an tarlang a; Mizoram sorkarin district pathum tihpuitlin a tum mekah, Khawzawl district-ah awm dawn se, kawng chungchangah harsatna an tawh leh tho dawn avangin, veivahna awlam zawk Saitual district-a beh chu an tan ṭha ber turah an ngai tih an ziak a ni.