KHAWTHLIR

Champhaia nitin chanchinbu, Rihlipui daily newspaper editor DK Lalhruaitluanga (39) s/o R Laihnuna (L), Champhai Vengthlang chu July 27, Inrinni zing dar 1:50 khan thin ṭha lo vangin Ebenezer Hospital, Aizawlah a thi a, nimin khan vui a ni. DK Lalhruaitluanga hian a nu Vanlalhmuchhuaki, a nupui Laldinpuii leh an fate pathum a kalsan a ni.

Inrinni khan ṬKP, Mission Vengthlang Pastor Bial chuan Aizawl Civl Hospital tan thisen unit 90 an pe a, a petute mipa 67 leh hmeichhia 23 an ni. Tuikhuahtlang Branch YMA-in YMA Day pualin Synod Hospital tan pein, mipa 24 leh hmeichhia pasarihte'n unit 31 an pe a; Lunglei Rahsi Veng PYD-in Lunglei Civil Hospital tan mipa 17 leh hmeichhia pathumte'n unit 20 an pe. ṬKP, Siaha West Pastor Bialte'n Saiha District Hospital tan unit 19 an pe a, a petute mipa 15 leh hmeichhia pali an ni.

Kolasib khawpuia kum lama upate inkawm hlimna leh a ṭul anga an hman atana sak, 'Hnam Rohlute Rûn' chu July 27, Inrinni khan LAD minister K Lalrinliana, bialtu MLA ni bawkin a hawng. Hnam Rohlute Rûn hi Mizoram Finance Commision grant 2017-2018 aṭanga sum hmuh nuai 18 hmanga sak a ni a, a dung ft. 24 leh a vâng ft. 30 a ni. K Lalrinliana chuan, upate'n inkawm hlimna atan leh Hnam Rohlute Rûn a tihchangtlun nan theihtawp chhuah a tum thu leh Rs. 50,000 pek a tum thu a sawi.

Lunglei district High Powered Committee vice chairman Lawmawma Tochhawng, MLA chuan July 26, 2019 khan Hnahthial a tlawh a; Hnahthiala KVK Demonstration Farm te, office hrang hrang - Rural Development, PHE leh AH&Vety office-te tlawhin, an hma­laknate a enfiah. Lawm­awma chuan, Lunglei district chu artui hmanga intodelh tura hmalak tum a nih thu a sawi.