Mizoram Legislative Assembly inthlanah Sorkarin Rs. 37,63,35,648 a hmang

November 28, 2018-a Mizoram Legislative Assembly inthlanpuiah khan sorkarin Rs. 37,63,35,648 (vaibelchhe 37.63) a sêng a; sum hmanna hlawm lian pasarih tarlan zingah lirthei hmanna atana senso Rs. 14,06,99,440 a tam ber a, district-a sum hman zingah Aizawl district-a hman a tam ber.

Vanglaini palaiin RTI Act hmanga a zawhna Election Directorate-in an chhan danin, Mizoram inthlanpuia sum hmannate chu hlawm pasarihah ṭhen a ni a; hlawm ṭhen pasarih zinga hmanna tam ber lirthei hmanna atana senso Rs. 14,06,99,440 chu sum hmanna hlâwm lian pasarih zinga cheng vbc. 10 chuang awm chhun a ni.

Zin veivahna hrang hrang - domestic travel expense (DTE) atan Rs. 7,46,18,068 hman a ni a, hei hi Mizoram chhung chauh ni loin, India ram hmun hrang hranga zin veivahna a tel. Other charge (OC) tia dahah Rs. 6,24,82,500 hman a ni a, office expenditure atana Rs. 5,35,13,600 hman a ni. Other administrative expense (OAE) atan Rs. 50,94,200 hman a ni a; thawktu hrang hrangte lawmman leh hlawh (wages) atan Rs. 3,83,51,790 leh publication atan Rs. 15,76,050 hman a ni bawk.

Mizoram inthlanpuiah khan Mizorama district pariat zingah Assembly constituency leh mipui tamna ber Aizawl district-ah sum hman tam berin Rs. 8,24,56,040 hman a ni a; sum hman tlemna ber Serchhip district-ah Rs. 2,71,33,400 hman a ni thung.

Vanglaini palaiin kum 2018 MLA inthlanpui neih hmaa Finance department hotute a kawmna tarlan tawhnaa a lan dan chuan, inthlan buatsaihna atana District Election Office hrang hrang, Election Directorate leh Central Armed Police Force (CAPF)-te tana Election department-in Finance department-a sum an dil zawng zawng chu cheng vbc. 52.75 a ni.

Sum dil zat hi a tam tham avangin Finance department chuan tihtlem dan ngaihtuah turin Election department an ngen a; inthlannaa a tak taka sum sen zat Rs. 37,63,35,648 chu a tira Election department-in sum hman tura an dil aiin cheng vbc. 15.12-in a tlem zawk ta a ni.