Health Minister-in Kolkata-a damdawi-inte a tlawh
Minister Dr R Lalthangliana chuan July 26 khan Kolkata-a damdawi-in hrang hrang a tlawh a; July 27, Inrinni zing khan North Eastern Council (NEC) Planning advisor CH Kharshiing leh Rodingi te chu Shillong-a Mizoram House-ah a kâwm.
Health minister hian Mizoram sorkarin Mizo damlote inenkawlna atana a pawm (referral hospital) hrang hrang - Apollo Hospital, AMRI Hospital, BM Birla Heart Research Centre, MEDICA Hospital te a tlawh kual a; damdawi-in an hotute nen inkâwmin, Mizoram aṭanga damlo sorkarin a refer tam takin hospital ṭhenkhatah harsatna an tawh chungchangte a sawipui.
Dr R Lalthangliana chuan hun rei tak Mizoram sorkar nen an inhmelhriat tawh avangin nurse, laboratory technician leh doctor-te short term training course a thlawna pe turin a ngen a; hei hi damdawi-inte chuan rem an tih thu an sawi.
Inrinnia NEC hotute nen an inkawmnaah hian Mizorama NEC-in hma a lakna hrang hranga sum la pek zawh loh chung-chang leh Pachhunga University College hostel sakna tura sum bawhzui zel dan tur te, Synod Hospital leh Spastic Society tihchangtlung nana sum hmuh belh dan tur te, NEC hnuaia hmalakna thar turte an sawi a ni.