Karnataka speaker-in MLA helte disqualify

Karnataka speaker KR Ramesh Kumar chuan nimin khan Congress MLA 11 leh Jana­ta Dal (Secular) MLA pathum­te chu MLA an nihna aṭangin assembly term hman mek chhung atan a disqualify.  Hemi hma hian MLA hel pathum chu disqualify an lo ni tawh bawk. 

MLA hel 17-te disqualify an nih  tak avangin assembly-a majority nei tura MLA neih ngai zat pawh a tlahniam dawn a ni. Karnataka sorkar thar, chief minister  BS Yediyurappa kaihhruai BJP sorkar chu vawiin hian fiah a ni ang. Governor Vajubhai Vala chuan July 31-ah sorkar thar hi fiah turin lo ti tawh mah se, a hun ruat aia hmain fiah a ni dawn ta a ni. 

Speaker hian Congress-JDS ṭangrual sorkar fiah a nih hma ni, kar liamta Ningani khan MLA hel pathumte chu a disqualify tawh a, nimina MLA 14 disqualify an nih leh tak avangin House-a member awm zat chu 208-ah a tla hniam.  Hei vang hian majority nei tura ngai zat chu member 105-ah a tla thla bawk. BJP hian MLA 105 a neih avangin fiahna pawh hi awlsam takin a paltlang thei dawn a ni. 

Assembly speaker thar thlan a nih hma chuan Ramesh hian a dinhmun hi a la chelh chhunzawm dawn a, bân mai a tum lo tih a sawi bawk. MLA helte ban an nih tak avang hian an bialah ṭheuh hian by-election neih a ngai dawn a; MLA helte hi term pum atana disqualify an nih avangin by-election ah pawh an chuh ve thei tawh dawn lo. MLA helte hian speaker thutlukna siam hi court-ah an khing let thei ang. 

BJP chuan speaker thutlukna siam chu sawiselin, democracy kalphung niloah an puh. Mahse Congress chuan speaker thiltih chu an fak thung a, thil dik tak tiah an ngai.  MLA duham tak tak chu hrem an ni ta a, spea­ker thutlukna hi judiciary lam pawhin a thlawp a ni, an ti.