Vice President-hoin MPC hruaitute an bang

MPC General Headquarters vice president Lalthansanga (Chatea) leh hruaitu ṭhenkhatin MPC party an bansan. MPC party dintu Brig. T. Sailo vision tihhlawhtlin duh tak tak duhtu nia an hriat vangin ZPM an zawm tih nimin khan Aizawl Press Club-ah thuthar thehdarhtute hmaah an sawi.

MPC party vice president thlan thar Lalthansanga chuan ZPM zawm tura MPC party chhuahsan a ngai chu hrehawm a tih thu sawiin, "Zoram damna tura Brig. T. Sailo vision hi MPC party aṭangin a hlawhtling thei dawn lo tih kan hmu a, ZPM aṭangin mipuite zarah hmasawnna kawng kan zawh theih kan beisei," a ti a, an ngaihdan chu MLA-te pawhin an thlawp tih a sawi.

MPC party senior general secretary Phairothanga chuan Mizoram siam beiseiin MPC-ah rinawm taka an lo awm thu sawiin, "Dinhmun ṭha zawk luah tura thlemna pawh kan lo hnar ṭhin. Kan duh hi MPC hlanga hlawhtlinpui a theih loh tih kan hriat hnuah thurualpui tur kan zawng a, ram vei pawlte leh party dangte nen inbiain ZPM huangah kan thawkho a, Pathian leh mipuite zarah MLA bial pariat laiah chakin bial 10 chuangah pahnihna kan ni. Sorkar ṭha duhna vangin ZPM-a thawkhote chu pawl pakhata insiam turin chhunglam leh pawn lamah nawrna a awm ta a ni," a ti a. Pawl pakhata insiam rawtna chu MPC party chuan a rel ve thei ta lo a, chu chu an kalsan chhan niin a sawi.

MPC Sr. General Secretary-in thuchhuah a siam danin, pawl pakhata insiam tura rawtna chu ZPM-a tel pawl dang zawngin an remtih hnuah MPC party-ah chuan committee agenda-ah pawh a lut thei lo. ZPM Steering Committee-in May 2019 chhunga ngaihdan siam fel tura ngenna a siam pawh party hruaitu thar thlan huna ngaihtuah atan dah a ni zel. July ni 10 & 11-ah hruaitu thar thlan a ni a, hruaitu tharte chuan elected OB pawh inrawn chuang loin party ngaihdan an duh duhin an puang ta mai a ni.

Phairothanga chuan, "OB kan insiam fel a, kan ṭhukhawm ang a, Executive Committee koh dan kan rel ang tia kan ngaih laiin, vawiina OB meeting koh chu president berin ṭul a tih loh thu a sawi ta si a, hetia pen chhuah hi kan tih theih awmchhun a ni," a ti a, ZPM-a tel pawl dangte pawh mahni pawl kalsana ZPM luhchilh vek turin a sawm a, Mizo ṭhalaite leh ram siam duh apiangte ZPM-a thawhhopuiah a sawm nghal bawk.

Nimina MPC chhuahsantute zingah hian vice president, consultant, senior general secre­tary, general secretary pathum, adviser, secretary leh ṭhalai president te an tel. Mizoram MLA general elec­tion 2018-a ZPM aṭanga thlan tlin zingah MPC party mi pathum Vanlalhlana, VL Zaithanzama leh C. Lalsawivungate pawhin MPC Ex-Officio Executive Committee member an nihna aṭangin banna an thehlut tawh tih puan a ni bawk.