Bawngkawn kawng a tlang

July 26, 2019 zing khawvar hmaa Bawngkawna leiminin NH-54 kawngpui, Bawngkawn-Ṭhuampui a hnawh pin chu ni thum chhung khawih a nih hnuah nimin tlai khan lirthei kal theiha thenfai a ni a, tlai dar 6-ah lirthei kaltir ṭan a ni.

Leimin hi a vaia thenfai a la ni lo a, lirthei tlan turte chu a inchhâwka tlàntir niin, traffic police duty-te thu ngaichâng turin thuneitute'n an ngen.

Hetih lai hian, Mual­khang rama leiminin NH-54 kawngpui a hnawh chu then mek zel a ni a; PWD engineer-in-chief K Lalsawmvela chuan, theihtawp chhuahin leimin then hna an thawk zel tih sawiin, "A khát tawkin lirthei tangkhangte kaltlangtir zel an ni a, mahse, a nâl avangin an kaltlang zung zung thei lo a, a remchan angin kaltir zel an ni," a ti.