15th Finance Commission meeting-ah Minister-in Mizoram sum mamawh thlen

July 28, Pathianni khan Mussoorie, Uttarakhand-ah state hrang hrang chief minister-te'n an state sum mamawh hrang hrang 15th Finance Commission-a an thlen chungchang sawihona buatsaih a ni a, Mizoram aṭangin chief minister Zoramthanga aiawhin minister of state TJ Lalnuntluanga a tel.

MoS TJ Lalnuntluanga hian Mizoram sum mamawh hrang hrangte 15th Finance Commission-a thehluh tawh chu ngai pawimawh tur leh chak taka hma laksak turin Central sorkar leh 15th Finance Commission hotute a ngen a ni.

TJ Lalnuntluanga chuan, Mizoram chu ruahtui tlak tamna leh tlang ram, leilung nghet lo a nih avangin chhiatna a thleng fo a, chu'ngah chuan sum tam zawk Mizoramin a mamawh thu a sawi a; inkalpawhna kawngpui leh hmasawnna ruhrel (infrastructure) ṭha zawk Mizoramin a neih theihna tur te, khaw lum zel tur venna turin ramngaw humhalhna atan sum tam zawk pe thuai tur tein sorkar laipui hotute a ngen.

Transport minister TJ Lalnuntluanga chuan, inland water transport chu Mizoram mai ni lo, India ram pum huap tan pawha east-west corridor tihhlawhtlinna atana pawimawh a nih thu sawiin, Mizoramah inland water transport a hlawhtlin theihna atan hma laksak turin a ngen. Border trade chungchangah, ramria intergrated check post leh immigration check post changtlung zawk siam a ngaih thu te, Mizoramin airport pakhat chauh a neih avangin mi tam takin harsatna an tawh thu leh airport tichangtlung tur leh airport mamawh belh a nih thute a sawi bawk.

Meeting-ah hian Union Finance minister Nirmala Sitamaran te, state hrang hranga chief minister leh an aiawh te, 15th Finance Commission Chairman leh member te, NITI Aayog Vice Chairman leh sorkar laipuia official dangte an 

tel a ni.