Ram páwn aṭanga vawk lak luhin harsatna lian zawk a thlen a hlauhawm - AH&Vety Minister

Animal Husbandry & Veterinary minister Dr K Beichhua chuan, ram páwn aṭanga vawk lak luhin Mizo mipuiah harsatna lian zawk a thlen a hlauhawm thu a sawi a, Mizo mipui chu ram páwn aṭanga vawk lak luhin nghawng a neih thui theihzia hriatpui turin a sáwm.

Dr K Beichhua hian nimin khan a pisaah thuthar thehdarhtute a kâwm a; sorkarna an chan tirh aṭangin vawka intodelh theihna atan leh sa hrisel mipuiin an ei theih nan theihtawp an chhuah thu sawiin, "Vawk pûl hri PRRS lêng ṭhin hi vawk vulhtute leh mipuiin an tuar a, PRRS kan control theih nan theihtawp kan chhuah a, sorkarna kan chan hnuah PRRS report kan la dawng lo," a ti.

Vawk lak luh khap ni mah se, a rûka la lut an awm reng tih sawiin K Beichhua chuan, "Khaw chhak lamah PRRS aia hlauhawm zawk African Swine Fever (ASF) a lêng a, hei hi vawkin a kai tawh chuan thih ngei ngeina a ni. ASF hian Myanmar leh Laos pawh a thleng thuai tura chhût a ni a, Mizoram pawh min nuai ve mai ang tih a hlauhawm hle a ni," a ti a; vawk tawlhru an awm reng chu pawi an tih thu a sawi.

AH&Vety Minister chuan, vawka intodelh theihna atan theihtawp an chhuah mek zel tih sawiin, "Duh angin kan la in supply thei lo. Kum hnih khatah chuan vawk notêah kan intodelh thei turah kan ngai," a ti. Minister ṭawiawmtu AH&Vety department hotute chuan, PRRS a lên lohna atan theihtawp an chuah tih sawiin, "Kum 2019-ah vawiin thlengin PRRS hri lêng a la awm lo. Department-in theihtawpa ṭan a lâk vang leh ram dang aṭanga vawk lak luh khapna district administrator leh police lamte nen ṭangruala kenkawh vanga ngaih a ni," an ti a; Myanmar aṭangin a rûka vawk lak luhna a tam avangin a rûka vawk lak luh a awm reng thu an sawi.

AH&Vety department hotute sawi danin, African Swine Fever laka inrin lâwkna atan AH&Vety chuan Veterinary College, Selesih nen ṭangrualin April 23, 2019 khan zirhona an buatsaih tawh a, Technical Committee on Preparedness of African Swine Fever pawh an din nghal.

Vawk lak luh khapna thupek ding lai a awm reng chungin Serchhip district-ah ṭum thum vawk man a ni tawh a, vawk puitling 29 leh vawkte 102 man a ni. Vawk neitu/phurtute chu Lalrobuaii d/o Hmingliana, Rokimi d/o Bualcheuva, Lalzopari d/o Thangvunga leh Lalbiaktluanga s/o Sanghleithang, Champhai Zotlang vek an ni.

Champhai district-ah ṭum hnih vawk man tawh a ni a, vawk puitling 24 leh vawktê 26 man a ni. Vawk neitu mante chu Lalhlimmawii w/o Sikulthanga, Kawlkulh leh Dawngnghakkimi d/o Dengchhuanmunga, Champhai Vengthar an ni. Lunglei district-ah ṭum khat vawk man a ni tawh a, vawk puitling 10 man a ni a, vawk mante hi a neitu/phurtu man a ni lo.

Aizawl district-ah ṭum hnih vawk man niin, Seling khuaah vawk puitling 82 man a ni. Vawk phurtu/neitute chu - Lalruatfela s/o Lalthantluanga leh Vanlalawia s/o Lalthanzama Champhai Bethel ve ve; PC Lalthanzauva s/o Liantawna, Mualkhar; Hmingthanvela s/o Remthanga, Champhai Venglai; 

Lalnunthara s/o Lalhmingmawia, Champhai Zotlang leh VL Thuthlungliana s/o Lalchhuanliana, Champhai Electric Vengte an ni. July 28, Pathianni zingah Zemabawkah vawk puitling 39 man a ni leh a, a phurtu/neitute chu - Lalfakawma s/o Rotluanga leh Lalnienga s/o K Laldinga, Champhai Bethel Veng ve vete leh  Thangrokima s/o C Chuhvela, Tuirial-te an ni.

Siaha district-ah pawh ṭum hnih vawk man a ni tawh a, an rawn phurhna lamah thawn kir vek a ni.