KHAWTHLIR

R Lalhmangaihsanga, Republic Veng lehkhabu buatsaih, 'Mizo General Knowledge & Competitive Exam Guide' chu nimin khan Mizoram State Sports Council (MSSC) secretary C Laltlanthanga'n Aizawl Press Club-ah 

a tlangzarh.

Aizawl City Bus Owners Association chuan State Transport Authority (STA) nen ruahmanna an siam angin, nimin aṭang khan Khatla kawn leh Ebenezer Medical Center inkarah city bus an tlantir ṭan. City bus service hi ni khatah vawi 13 vei tawn hman tura ruahman a ni a, bus hmasa ber chu zing dar 7:30-ah Khatla aṭangin a chhuak ang a, a hnuhnung ber chu tlai dar 5:20-ah Ebenezer Hospital aṭangin a chhuak ang. A inkarah stand pasarih a awm dawn a, Khatla aṭanga Ebenezer thlenga chuan man chu Rs. 20 a ni.

Mizoram DIET Faculty Council (MDFC) chuan Chief Minister's Relief Fund-ah nimin khan Rs. 50,000 an chhûng lut. CMO chuan, CM Relief Fund petute chungah lawmthu a sawi a, pawisate chu ṭangkai taka hman tur a nih thu an tarlang.

Mizoram State Election Commission (SEC) chuan Aizawla veng pathum Chaltlang, Chhinga Veng leh Kanan Venga local council by-election neih tura hman turin nimin khan draft electoral roll a tichhuak. Draft electoral roll hi Assembly electoral roll thar ber behchhana siam a ni a, July 31, 2019 thleng inthun luh, paih leh siamrem ngai dilna thehluh theih a ni.

PRISM party chuan, Election Commission of India (ECI)-in dik lo takin Tripura-a khawsa mek Bru-te Mizorama vote a neihtir chu dan kalh niin an ngai a, ECI thu khin lêtna turin public interest litigation (PIL) thehluh an tum. PIL thehluh an tumna atana inbuatsaih nana signature campaign an buatsaih tur chu nimin chhun dar 12 khan an hawng. PRISM chuan, signature campaign an neih turah hian hming ziak turin Mizo mipui an sáwm a ni.