MPC Vice President-in an chhuah chhan a sawi
ZPM senior vice president leh MPC vice president Lalthansanga (Chatea) chuan, MPC dintu Brig. T Sailo policy âtchilhtute an nih reng thu sawiin, Ṭhenphunga policy tuipuitu party-ah a zawng zawnga thawk turin MPC aṭanga bángin ZPM-ah an inpe pumhlûm ta tih a puang.
Nimina ZPM pisaa inkhawmah thu sawiin Lalthansanga chuan, "Pu Ṭhena khan ‘Ngaizel khâmah zuangthla rawh u,’ min ti se, dam chuan vanneih a ni mai tih rilru pu chungin kan zuang thla duh hial ang. Chuti khawpa amah leh a policy tuipuia ngaisangtu kan ni. Rangkachak anga tuiêk thei lo Pu Ṭhena policy tuipuitu party-ah vawiinah hian a zawng zawnga thawk turin MPC aṭanga bángin kan ZPM pumhlûm ta a ni," a ti.
MPC party-a senior general secretary Phairothanga pawhin thu sawiin, MPC chhuahsana ZPM-a an awm ngheh tâk chungchang a sawifiah a; Mizoram hmun hrang hranga MPC-te chu rei lo têah ZPM-ah an inchhûn luh vek tur thu a sawi.
ZPM senior vice president dang C Lalṭanpuia chuan, ZPM chungchangah pumkhata awm leh party dang chêtchhiatna sawia phûr ringawt loin, kalphung thar kawng zawha a taka chêt chhuah a ṭul thu a sawi a; sum leh therhlo dang hmang te, dâwt leh finfiah hleih theih loh hmangtea sorkarna siam tum lo turin ZPM mite a sáwm.
C Lalṭanpuia chuan, Mizoramin ramri buai a neih chu vei ringawt a tâwk lo tih sawiin, "Chingfel tura a taka thawh a ngai a, sorkarna chelhtute mawhphurhna a sang hle," a ti a; Kristianna leh politics chu inhne rem taka kalpui theih a ni tih sawiin, "Politcs-ah Krista Chanchin ṭha a zalen chuan rorelna ṭha leh dik a thleng ngei dawn a ni," a ti bawk.