Zawlnuam khuaah CSC din thar

UDPA department hnuaiah Mamita thawktute chuan nimin khan Zawlnuamah Children Sanitation Club (CSC) an din a, naupangte hnenah faina leh thiang­hlimna chungchang an zirtir nghal.

CSC hawnna inkhawm hi Zawlnuam Vengpui YMA building-ah hman a ni a, Zawlnuam BDO Lal­fakawma Chhakchhuak-in a kaihruai. BDO chuan, faina kawngah Zawlnuam chu khaw entawntlak tak an nih thu leh chu chu chhunzawm zel an tum thu a sawi.

Swachh Bharat Mission (Gramin), Mamit district-a ambassador Laltharzeli chuan, Mamit­a UDPA department-in khaw faina kawnga hma an laknaah  naupangte'n faina an nunpui a pawimawh thu a sawi a; Zawlnuamah CSC din a ni ta chu lawmawm a tih thu sawiin, naupang zawng zawng, veng hrang hranga mite chu CSC member ni vek turin a sáwm a, nu leh pate pawh faina kawngah ṭan la turin a chah bawk.

UDPA department hnuaiah hian Mamit leh Zawlnuamah CSC pali din a ni tawh a; Zawl­nuam CSC hawnnaah hian naupang 120-in hming an ziak lut nghal a ni.