August aṭangin Aizawlah plastic khap a ni dawn

Aizawl Municipal Corporation (AMC) chuan naktuk, August 1, 2019 aṭang hian Aizawl khawpuiah plastic pan chi hman a khap dawn. AMC mayor PC Lalhming­thanga chuan, mipui vang liau liaua plastic khap a nih dawn thu a sawi. 

AMC hotute chuan nimin khan Aizawl Press Club-ah thuthar thehdarhtute an kâwm a; AMC Mayor chuan, plastic pan chi an khap tur chu a theih ang angin an puanzar tawh thu sawiin, "Mipui hian duh aiin an la hre chiang tâwk lo em ni aw kan ti. Mipui hriselna atan te, lui dung a thianghlima nungchate an hriselna atante leh, leilung venhimna atantea khap tur kan ni. Mipui hian a pawimawhzia hre chiang se kan duh hle," a ti.

PC Lalhmingthanga chuan, plastic khap chu mipui nen ṭanho loh chuan hlawhtlin theih a ni lo tih sawiin, "Khap thil mipuite'n an tih loh hian thil khap hlawhtlinna chu a ni mai," a ti a; plastic khap tura an hmalakna chu ṭawiawm turin mipui a sáwm.

AMC Mayor sawi danin, Aizawl khaw­puiah chhungkua 67,594 vel an awm a, AMC-in bawlhhlawh a lâk khawm chu ni tin metric ton 159.8 vel a ni a, chu'ng zingah chuan plastic tam tak a awm. Plastic chhia zingah bawlhhlawh paihnaa paih aiin, hmun danga paih a tam zawka chhût a ni.

AMC zir chianna aṭangin, Aizawl khaw­puiah plastic lam chi ni tin quintal khat vel hmang ziah ang a ni a; plastic hman tlem leh a theih ang anga thlâk a ṭulzia hriain, September 20-21, 2018 chhung khan No Plastic Exhibition an buatsaih tawh. Exhibition-ah hian plastic aṭanga thil siamte thlakna tur eng emaw zat pho lan a ni a, tunah pawh lei tur eng emaw zat a awm a ni.

AMC-in hma a lak mek laiin, sorkar laipui chuan plastic lam chi hman nasat pawizia a hriat chian avangin September 2018 khan urban local body-te hnenah lehkha a thawn a, October 2, 2019 aṭangin plastic hman lohna khawpuia puang vek turin a hriattir a ni. AMC Board of Councillor meeting pawhin Aizawl chu Plastic Free City ni turin a rél a, August 1, Ningani aṭangin a taka kalpui ṭan a ni ang.

Plastic khap turte chu, plastic aṭanga thil siam pan zual micron 50 aia pante a ni a, Mizorama polythene hman tlanglâwn ho hi micron 50 aia pan deuh vek a nih avangin, khap zinga tel tura ngaih a nih thu AMC hotute'n an sawi. Vawi khat hmana paih nghal theih (one time use / disposable) plastic bottle, no, thleng leh fian lam chite khap tur a ni bawk. Polythene pan chite Aizawla lak luh a nih loh nan AMC chuan danpui turin Mizoram sorkar an ngen tawh a ni.

Vanglaini palai zawhna chhangin AMC Mayor chuan, "Plastic khapna dan bawhzui turin casual worker mi 50 dawn lak an ni a, training tir mek an ni. An training zawhah Aizawl khawpui chhunga dawrahte kal kualin kan thil khapte zuar lo turin an ngen a, a endik leh hna pawh AMC officer-te nen an thawk chhunzawm ṭhin dawn a ni," a ti.

India rama state eng emaw zatah plastic bag, micron 50 aia pan khap a ni tawh a, kumina khap ṭan tum eng emaw zat an awm. Plastic aṭanga siam thleng leh no, vawi khat hman chi (single use / disposable) pawh state ṭhenkhatah khap a ni tawh a; a khap hmasa ber Maharashtra chuan March 23, 2018-ah an khap ṭan a, Telangana-in June 2018 leh Himachal Pradesh-in July 2018-ahte an khap ṭan a, Tamil Nadu-in January 1, 2019 aṭangin an khap ṭan bawk a ni.