Sum siamna tur project a awm tur a ni lo - CM

Sports, Youth Affairs & Tou­rism Board chuan nimin khan chief minister Zoramthanga hoin CMO Cabinet meeting room-ah an ṭhukhawm. Chief Minister chuan, mi ṭhenkhatin sum an siamna tura din thil engmah a awm tur a ni lo tih a sawi.

CM Zoramthanga chuan, sorkarin hmalakna atana project a siam hrang hrangte chu mamawhnain a hrin chhuah ni se a duh thu a sawi a, "Ṭhenkhatin pawisa an siamna tura din engmah a awm tur a ni lo," a ti. Meeting-ah hian Board hma­lakna tura harsatna awm thei leh hmalak hmasak theihna turte sawiho a ni. Sport-ah chuan national leh international level-a thleng tura theihna Mizo ṭhalaitea awm, discipline hrang hrangte thlîthlai a tihchangtlun dan ngaihtuah a ni a; chumi rual chuan, tualchhunga discipline hrang hranga hmunhma ma­mawh­te siam leh tihchangtlun dan ngaihtuah ni se, an ti.

Board chairman, Sports leh Tourism changtu minister Robert Romawia Royte chuan, Tourism lamah hmasawnna ruangám ṭha tak tak siam turin ruahmanna siam mek a nih thu a sawi a, "Mizo­ram hi khualzin mite'n an rawn ngaihven viau a, mipui lama inpuahchahna a ṭhat ve a pawi­mawh," a ti a; tourism hmasawnna atan inkalpawhna kawng ṭha neih hmasak a pawimawh thu a sawi.