2015-2019 chhungin Lengpui Airport aṭangin Mizoram sorkarin Rs. 13,35,82,791 a hmu

Mizoram sorkar chuan kum 2015 aṭanga June 2019 thleng khan Lengpui Airport-a thil hrang hrang aṭangin Rs. 13,35,82,791 (nuai 1,335.82) a hmu. He mi chhung vêk hian Lengpui Airport atan Mizoram sorkarin cheng nuai 1,405.27 a hmang a, sum hmuh aiin hman a tam zawk.

RTI Act hmanga information dilna GAD-in an chhan danin, Mizoram sorkar chuan kum 2015-16 aṭanga kumin sorkar kum kal mek (2019-20) chhungin cheng nuai 1,405.27 a hmang. Kum kal mek 2019-20 (financial year)-ah hian thla thum, April-June chhungin cheng nuai 361.50 hman a ni a, hei hi a hma kum li chhunga kum tina sum hman zat (thla 12 chhunga sum hman zat) aiin a tam tawh zawk. Kum 2015-16 chhungin nuai 195.90, kum 2016-17 ah nuai 189.85, kum 2017-18 ah nuai 328.08 leh kum 2018-19 chhungin nuai 329.94 hman a ni.

Mizoram sorkar chuan kum 2015-16 aṭanga kum 2019-20 June thla thlengin Lengpui Airport aṭangin Rs. 13,35,82,791 a hmu tawh a; kum nga chhunga a hmuh tam ber kum 2018-19 chhungin Rs. 4,40,46,598 a hmu. Kum 2015-2016 aṭanga 2019-20 chhungin passenger service fee aṭangin Rs. 4,64,18,633 hmuh a ni a; kum 2017-18 chhunga passenger service fee aṭanga sorkarin sum a hmuh zat leh kum kal mekah April-June thla chhunga hmuh zat tarlan a ni lo. Helicopter boarding fee aṭangin Rs. 8,09,68,089, terminal entry fee (terminal chhunga luh man) aṭangin Rs. 10,85,590, rental charges (thil/bungrua hman man) aṭangin Rs. 17,40,122, hoarding tàr man aṭangin Rs. 25,35,112 leh parking fee aṭangin Rs. 8,35,245 hmuh a ni bawk.

Airline-te'n Lengpui Airport an hman man chungchanga zawhna chhangin GAD SPIO chuan, airport runway, ṭum man leh thlawh chhuahna atana hman man chu Mizoram sorkarin a tél lo a, Airport Authority of India (AAI)-ah an pek ṭhin thu a tarlang a, "Passenger Service Fee erawh chu department-in changin, ticket pakhat zelah Rs. 229 lak a ni," a ti. GAD SPIO tarlan danin, kum 2015-16 (April 2015) aṭanga kumin June thla thleng khan passenger service fee aṭanga Mizoram sorkarin sum a hmuh dan chu - Air India aṭangin Rs. 99,88,654, Jer Airways aṭangin Rs. 3,87,01,564 leh Pawan Hans aṭangin Rs. 8,09,68,089 a ni.