KHAWTHLIR

Pachhunga University College-a Physics department chuan July 29, Thawhṭanni khan an college-ah 'Quantum Science and Techno-logy' tih thupui hmangin national level workshop an buatsaih a, Mizoram University pro vice chancellor Prof. RP Vadhera-a'n a hmanpui. Workshop hawnna inkhawm chu PUC principal Dr Tawnenga'n a kaihruai a, India rama scientist thiam leh langsar tak takte'n thupui chi hrang hrang an sawi a ni. Workshop hi nimin khan chhunzawm a ni a, vawiinah chhunzawma khar a ni ang.

Dinthar Thlanmual - Kanan Veng inkar kawng thawm ṭhat chu nimin khan minister of state Lalruatkima’n a hawng. Kawng hawn tâk hi kum 2014-ah MLA LAD fund leh hmun dang aṭanga sum hmuhte hmangin lirthei tê (LMV) kal theiha laih zau a ni a, RCC pavement siam a ni. Kawng thawm ṭhat nan hian cheng nuai 164.24 sên a ni.

Mizoram Mistiri Association (MMA) chuan nimin khan an din champha vawi 12-na an lawm. MMA Day pual hian Ṭawngṭai Bethel Camping Centre, Sakawrtui­chhun biak-in sain, thâ 480 leh Rs. 70,000 an seng tawh a; Mizoram khaw hrang hranga an branch-te chuan mitthi kuang leh damdawi-in mamawh hmanruate an siamsak bakah, vantlang tan hna hrang hrang an thawk. MMA hi July 30, 2007-a din a ni.

Bairabi leh Zamuang inkar kawngpuia Teirei lei (bridge) chu sorkar ruahman angin, vawiin hian lirthei zawh theih him chin enfiah tur a ni a, nilenga hun hman a nih dawn avangin enfiah a nih chhungin lirthei tlan tlang theih a ni dawn lo. PWD Kawrthah Division chuan mipui hriatthiamna an ngen a ni.

Kolasib District Monitoring Committee on Accessible Election chu nimin khan election officer Vanlalchhuanawma Chawngthu hoin an ṭhukhawm a, Lok Sabha MP inthlan neih zawh tak an thlir let. Inthlan neih zawh tak chu ṭhál lai a nih avangin khaw hrang hrang kal pawhna kawngah harsatna a awm lo a, mahse, fûr laia in­thlan buatsaih a nih dawn chuan Rastali (Zodin), South Chhimluang leh North Thingliante chu pan hleih theih loh a nih tur thu tarlan a ni.