MPC party-in thil awmzia an sawifiah

Mizoram Peoples' Conference (MPC) party chuan thuchhuah siamin, an party-a an ṭhian ṭhenkhatte'n MPC ṭhiah a, ZPM party-a inchhûn luh an tumna a puitlin theih loh vanga MPC an chhuahsan chu pawi an tih thu leh an ui tak zet thu an tarlang a; an kal zelna turah duhsakna an hlan.

MPC chuan, ZPM anga thawhhona thu­thlung an siamah, pawl leh party ṭhiat kher loa inthlanna chuh ni se, tiin lungrual taka an thawhho thu leh inthlanah pawh bial pariat lai an lâk theih thu an sawi a, "Pawl leh party ṭhiat kher loa kan thawhhonaah hian kan lungrual tlàn hle laiin, party leh pawl ṭhiat tura innawrna hun eng emaw ti aṭang khan a lian ta a, a nghawng kal zelah vawiina kan ṭhian, kan thawhpuiteah hlet a rawn chhuah ta a ni," an ti.

July 10-11, 2019-a MPC General Assembly-a hruaitu thar thlan a nih hnuah elected office bearer-te inràwn khawmna aṭangin ZPM chungchanga an party dinna chung­chang press conference hmangin an puang tih sawiin MPC chuan, "Kan puan kha mimal thuneihna hmanga hmalak a ni lo," an ti a; MPC chu an insiamrem mek a, an la inpeih fel loh avangin OB meeting pawh an la nei thei lo niin an sawi.

ZPM aṭanga thlan tlin MLA zinga MPC mi leh sa pathumte chungchangah MPC chuan, "Anti-Defection Act-in a phuar avang­in eng party-ah mah member an nih theih loh avangin, MPC party leh ZPM-a an nihna leh chanvo an neih zawng zawng an inhnûkdâwk a, MPC an duh loh vanga chhuak an ni lo," an ti bawk.