Mizo thuam humhalh dan tur sawiho

Central YMA hruaitute leh ZOHANDCO hotute chu nimin khan Chaltlang Lily Venga ZOHANDCO chairman C Lalrammawia office-ah an inkâwm a, Mizo ­thuam siam chhuah, humhalh leh inbel chung­changa hmalak dan tur an sawiho.

Inkawmhonaah hian C Lalrammawia chuan, Mizo thuam humhalha chawi nun zel kawngah YMA nen an thawhho a ṭul thu sawiin, "Ram leh hnam humhalh kawng­ahte YMA-te hian hna ṭangkai tak tak in thawk tawh ṭhin a, ZOHANDCO nen pawh kan ṭanho chuan nasa takin hma kan sawn ngei ka ring," a ti a; ZOHANDCO chu company rules hnuaiah dan ang thlapin December 20, 1988-a din a nih thu a sawi.

CYMA vice president R Lalngheta chuan, YMA-in Mizo hnam incheina an vei a, vawn nun kawngah an theih ang angin ṭan an la ṭhin tih sawiin, "Thang­chhuah kawr chung­changah MUP-te'n 'Hei hi a dik a ni, sign rawh u,' an ti a, an zahawm si a, dik ber hre chuang loin kan sign sak lo thei lo. A dik tak hriat a har tawh a, a inang lo nuai tawh. CYMA chuan thang­chhuah kawr leh tawlh­loh puan bik hi chu, eng anga hotu lian leh lal pawh ni se, lo bahtir leh hâktir ve ngawt kan ui em em ṭhin a ni," a ti.