RD Minister-in MCS training a hawng

Rural Development minister Lalruatkima chuan nimin khan State Institute of Rural Deve­lopment & Panchayati Raj (SIRDPR), Leitanah Mizoram Civil Service (MCS) officer (2019 batch)-te tana Rural Development kalpui dan a bik taka zirna a hawng. Training hi March 20, 2020 thleng awh tur a ni.

Minister Lalruatkima chuan, India ram zalenna sual chhuaktu Sardar Vallabhbhai Patel-a'n India ramin civil service ṭha tak leh lehkhathiam hnathawk tur a neih loh chuan inenkawl a har tur thu a lo sawi tawh tih a sawi a, "Mizoramah ngei pawh state civil service-te hian state hmasawnna leh hma lam hun atan pawimawhna nasa tak in nei a, he dinhmun thleng tura in kawng zawhte thil awlsam a ni lo a, mi bik in nihzia tarlanna a ni," a ti.

Lalruatkima chuan, roreltu leh dan siam­tu (legislator)-te an pawimawh em em rualin, a kengkawhtu (executive) officer ṭha tak takte pawhin sorkar chak leh chak lo neihna kawngah mawhphurhna sang tak an nei tih hre reng turin MCS officer-te a chah a ni.

RD Minister chuan, Conduct Rules leh sorkar hnathawk kaihhruaina dan hrang hrangin a sawite zâwm tlat tur te, public servant an nihna anga mipui tan harsatna siamtu ni lo a, mite tana malsawmna nih tum tur te, mipui rin ngam leh nungchang pawh uluk turtein a ngen a; sorkar tana theihtawp chhuah a, rinawm taka thawk tur leh central service thleng thei tura bei zel turin a chah bawk.

Training hawnna hi SIRDPR director Lal­hmunsanga Hnamte-in a kaihruai a; SIRDPR se­nior core faculty (RD) Dr Margaret Lalbiakthangi'n training course report a sawi a, Administrative Training Institute-a Joint director Angela Zothanpuii'n Mizoram State Civil Services foundation course chungchang a sawi thung.