2021-22 BE-ah department 14-te 2020-21 aia tam sum ruahmansak
Kum 2021-22 budget (budget estimate)-a sorkar department hrang hrang tana sum ruahmanah department 14-ah chiah kum 2020-21 budget estimate (BE)-a sum ruahman aia tam ruahmansak a ni.
Kum hmasa aia BE-a sum nei tam zawk turte chu - PHE, Governor, Social Welfare, Disaster Management & Rehabilitation, MPSC, Personnel & Administrative, Parliamentary Affairs, Agriculture, RD, P&E, Commerce & Industries, Transport, UDPA leh Irrigation & Water Resources department-te an ni a; District Council & Minority Affairs chu a ngai ang chiah an nei dawn.
Sorkar department zawng zawng deuh thawin 2021-22 budget-ah hian 2020-21 budget revised estimate (RE) an phâk lo a, Governor leh Irrigation & Water Resources department chuan an khûm dawn thung. Kum 2020-21 ah hian department pahnih chiah BE aia RE-a sum hmu tlem zawk an awm.
Finance department chu BE-ah cheng nuai 2,19,776.45 dahsak an nih laiin, RE-ah chuan nuai 1,25,244.80 an hmu a; Legislative Assembly chu BE leh RE a inzat chiah a, cheng nuai 3373.12 ve ve a ni.
Kum 2020-21-a BE leh RE inthlauh tam zualna department-te chu - Sports & Youth Services leh Social Welfare department an ni. Social Welfare chu BE-ah cheng nuai 14,185.22 a nih laiin, RE-ah chuan 28,666.55 an nei a, BE aiin RE-ah cheng nuai 14,481.33-in a tam zawk. Sports & Youth Services chu BE-ah nuai 3,239.53 dah a nih laiin, RE-ah nuai 15,033.52 a ni a, a inthlauhna chu cheng nuai 11,793.79 a ni.