COVID-19: Mizoram dinhmun Hripui vei mi 3 hmuh belh a ni
March 1, Thawhṭanni khan Mizoramah Covid-19 vei mi pathum hmuh chhuah a ni a, an zinga pahnih chu natna (symptom) lang chhuak an ni. Nimin khan hripui laka fihlîm tawh mi pakhat chhuahtir a ni thung.
Covid-19 vei Thawhṭannia hmuh tharte chu Rapid Antigen Test hmanga hmuh chhuah vek an ni a; ZMC laboratory leh district pangaa TrueNAT-PCR hmanga swab sample endik zingah hripui vei an awm lo.
Hripui laka fihlim tawh, enkawlna hmun aṭanga nimina chhuak chu Champhai CCC aṭanga chhuahtir a ni.
Mizoramah Covid-19 vei mi 4,426 hmuh chhuah a ni tawh a, mipa 3,229 leh hmeichhia 1,197 an ni. Nimin tlai dar 5 thleng khan mi 4,397 (99.34%) chhuahtir an ni tawh a, mi 10 (0.23%) thi tawhin, enkawl mek mi 19 (0.43%) an awm.
March 1, Thawhṭanni khan ZMC laboratory-ah RT-PCR hmangin swab sample 28 endik a ni a, TrueNAT-PCR hmangin district pangaah sample 11 leh RAT hmangin district 11-ah sample 971 endik a ni bawk. Thawhṭannia sample endik zat chu 1,010 a ni a, chu'ng aṭanga Covid-19 positive hmuh chhuah pathum chu 0.29% a ni.
Hripui vei hmuh thar pathumte chu tun hnaia state pawn aṭanga haw vek an ni a; mahse, an zinga pahnih chu Mizorama haw dawnah leh Mizorama luh hlima swab sample endiknaa negative niin, a hnuah anmahniah natna a lan chhuah avanga endik nawn an nihnaah hripui an vei tih hmuh chhuah a ni.
March 1, 2021 thlenga Mizorama swab sample endik tawh zat chu 2,33,303 a ni a, chu'ng aṭanga Covid-19 positive mi 4,426 chu 1.90% a ni. Hripui vei hmuh tawh zinga mi 2,111 chu Mizoram chhunga kái chhâwng an ni a, mi 2,315 chu Mizoram páwn aṭanga an rawn luh hnua hmuh chhuah an ni thung.
Mizorama district 11 zinga paruk Siaha, Kolasib, Serchhip, Lawngtlai, Khawzawl leh Hnahthial district-ahte Covid-19 vei an awm tawh rih lo.
Covid-19 vei hmuh tharte
Upper Republic - 1: Hmeichhia kum 31, hri kaina hriat chian loh, symptom nei. Kolkata aṭanga haw, an haw dawn (24.2.2021)-a RT-PCR hmanga sample endikah a negative avanga Lengpui Airport-a endik nawn loh a ni a; private hospital-a a hna a zawm hnuah symptom a neih avangin a thawhna damdawi-inah swab test niin, a positive a ni.
Mamit - 1: Mipa kum 68, January thlaa Tripura aṭanga zin haw, a haw hlima RAT-a negative a ni. A hnuah symptom a neih avanga sample test lehah a positive; hri a kàina hriat loh.
Hnahlan - 1: Hmeichhia kum 2, Manipur aṭanga haw, Tuivai screening point-a sample endik, symptom nei lo.