AMC hotute'n SWMC an enfiah

Aizawl mayor Lal­rinenga Sailo leh ruling councillor-te chuan nimin khan Aizawl khawpui bawlhhlawh sawngbawlna Solid Waste Management Centre (SWMC), Tuiriala bawlhhlawh sâwngbawl dan an enfiah.

Lalrinenga Sailo chuan, AMC sorkar tharin Aizawl khawpui faina turin hmalak a tum thu sawiin, "Bawlhhlawh lâk khawm dan pawh tun aia huam zau zawk turin tih kan tum a, hmun kilkhâwr zawk leh kawngpui hlata awmte pawh khawn turin hmalak kan tum," a ti a; AMC hmalakna chu ṭha taka ṭawiawm turin mipui a sáwm.

Bawlhhlawh ṭawih thei lo, hralh theihte chu hralh zung zung a nih theih nan hmalak a ṭul thu sawiin Mayor chuan, "Com­pany-te nen direct-a inbiain, hmalak a ṭhain ka hria. Chuti a nih loh chuan bawlhhlawh hian thawktute a ûm chhuak mai dawnin a lang," a ti a; a rang lama hmalak a ngaih thu leh bawlhhlawh thliar kawngah mipuite'n kaihhruainate an zawm ṭhat a ngaih thu a sawi. 

SWMC enkawltu SIPMIU hotute sawi danin, bawlhhlawh sawngbawlnaa hralh chhuah theihte chu company pali hnenah an hralh mek a, thla khatah metric ton 250-300 vel an hralh ṭhin. Chutih laiin, hralh chhawn theih bawlhhlawhte chu thla khatah metric ton 1,300 vel a lut ṭhin a, thla tin hralh sên loh metric ton 1,000 vel a awm ṭhin a ni.

Bawlhhlawh ṭawih thei aṭanga leiṭha siamte chu a ṭha thaw khat a, an la hralh chhuak rih lo. SIPMIU hotute chuan, Aizawla veng 83 zinga veng 10 vel bâkin a nihna tur angin bawlhhlawh an thliar loh thu an sawi.

SIPMIU hi June 2021-a tàwp tur a ni a, AMC hnena bawlhhlawh paihna hmun an hlan hun tur erawh hriat a ni lo.

AMC hotute chuan, November 2020 aṭangin SWMC-ah thawktu an dah ṭan a, February 2021 aṭangin a chhunga inrêlbàwl dan zir turin junior engineer an dah tawh thu 

an sawi.

SWMC-ah hian ni khatah bawlhhlawh ṭawih thei lo ton 74, ṭawih thei ton 72 leh sanitary landfield-a phûm tur ton 44, a vaiin ton 190 dâwl zo tura duan a ni a; tun dinhmunah ni khatah ton 66 vel phurh luh ṭhin a ni.

SWMC chhungah hian SIPMIU hnuaia bawlhhlawh thliar hna thawk mi 80 an awm mek a, JCB pathum leh excavator, roadroller leh tipper pakhat ṭheuh ni tin an thawk ṭhin. SIPMIU chuan bawlhhlawh paihna hlui thenfai hna an thawk mek bawk.

Bawlhhlawh sawngbawlna enfiahnaah hian deputy mayor R Thanglura, executive councillor pahnih Laltlanzova Khiangte leh B Lalawmpuii, councillor dang pathum Lalfakzuala Chenkual, John Zosangliana Ralte leh Chuauzikpuii te bakah, AMC official-te an kal a ni.