Tuialhtheia chhiah lâk tihniam turin MPYCC-in Mizoram sorkar an phût

Mizoram Pradesh Youth Congress Com­mittee (MPYCC) chuan nimin khan Congress Bhavan-ah thuthar theh­darhtute an kâwm a; petrol leh diesel-a chhiah lâk, value added tax (VAT) tihniam turin Mizoram sorkar an phût tih an puang.

MPYCC president Dr Lalmalsawma Nghaka chuan, Mizoram sorkarin Covid-19 chhuanlamin petrol leh diesel-ah chhiah a tipung tih sawiin, "VAT tihpunna hi petrol-ah litre khatah 5% a tling a, diesel chu 2% a ni. Petrol-a chhiah 20% lâk ṭhin chu 25%-ah tihsan a ni a, diesel chu 12% aṭangin 14.5%-ah tihsan a ni. State dangah chuan Covid-19 avanga petrol leh diesel-a chhiah lâk tipung vete pawhin an tihniam leh mek," a ti.

Dr Lalmalsawma chuan, tuialhtheia chhiah lâk, VAT bik chu state sorkar thuneihna a nih thu sawiin, "Tuialhthei man to avang hian mipui tawrhna a nasa tawh. Thil dang man pawh a to phah. Mizoram sorkar hian tihniam nghal se kan duh. Sum awm lo an ti a, an duhsak zawng tan chuan restricted tender an chhuah zel tho," a ti a; chhiah tihhniam a nih loh chuan an nawr zel tur thu a sawi.

BJP kaihhruai sorkar hnuaiah tuialtheia chhiah lâk a pun nasat thu sawiin Lalmalsawma chuan, "Tunlai hi khawvela crude oil (tuialhthei thlitfim loh) tlâwm lai ber a nih laiin, India ramah oil a to lai ber a ni thung. Sorkar laipuiin oil man a tihtoin a nghawng nat em em laiin, Mizoram sorkarin a tihto belhchhah leh bawk. Mizoram sorkarin chhiah a tihpun chhan hi financial management an thiam loh vang a ni," a ti.

MPYCC President sawi danin, Congress kaihhruai UPA sorkar laiin tuialhtheia chhiah lak chu litre khatah petrol-ah Rs. 9.38 leh diesel-ah Rs. 3.56 a ni a, BJP sorkarah chuan petrol-ah Rs. 32.98 leh diesel-ah Rs. 31.83 a ni.

MNF chu central-ah BJP nen ruling bench-a ṭhu inti an nih thu sawiin MPYCC chuan, "Central sorkarin tuialhtheia chhiah lak a tihpun vak hi MNF sorkar hian tihniam turin nawr ngam rawh se," an ti.