Ni chhuah sàn vah tawh hnuah Inthlan a ni dawn - Zoramthanga

MNF party chuan Serchhip constituency-a Assembly by-election awm tur pualin nimin khan Serchhip leh Thenzawlah campaign hawnna inkhawm an buatsaih a, campaign an ṭan. MNF president Zoramthanga chuan, by-election chu ni chhuah sàn vah hnuah inthlanna a nih dawn thu sawiin, MNF candidate Vanlalzawma vote turin bial mipui a sáwm.

Zoramthanga chuan, Serchhip bial by-election-a ding turin Vanlalzawma an duh ber nia sawiin, "Tun dinhmunah MNF President leh Sr. Vice President-te'n party headquarters kan enkawl hman rih lo. Ani hi a taka MNF enkawltu, hotupa ber a ni a, tute emaw anga leader vuah chawp mai mai a ni ve lo," a ti a; Vanlalzawma an thlan tlin chuan an ti fuh hle dawn niin a sawi.

Serchhip bial hmun pawimawh awmna a nih avangin ruling MLA neih a ṭul nia sawiin Zoramthanga chuan, "District headquarters dangte pawhin ruling minister leh MLA an neih avangin Serchhip leh Thenzawl hian eng nge an neih ve dawnṭ Ni chhuah san vah hnuah kan inthlang dawn a, ni tlâk hun in la nghak a nih chuan a ṭha lo ang," a ti. 

MNF President chuan MLA aṭanga inpaih chungchang sawiin, "MNF hian mi bàntir thei ni se, eptu MLA dangte pawh kan bàntir vek ang. Party tin hian anmahni eptu bàntir an duh vek ang," a ti a; dan bawhchhiat vang zawkin inbàntir a nih ṭhin thu a sawi.

Lalduhoma chungchang sawiin Zoramthanga chuan, "Speaker pawhin independent candidate a nih angin a chêt danah thuràwn a pe tawh a, nimahsela, inrun luih ang maiin ZPM-ah mi thar a lawm lut zui zel. Ekdom ZPM-a a chêt avangin danin a bàntir a ni," a ti. 

Vanlalzawma pawhin thu sawiin, "Tun ṭumah hian in khawngaihna ka dil leh a ni. Thlan tlin ka nih chuan khawtlang, kohhran leh mamawh apiangte tan ka inpe ang tih ka puang duh. Hnathawh kawr min hâktir chhin teh u," a ti a; by-election awm turah MNF-in candidate-a an dah chu a lawm thu a sawi. 

MNF thuchhuah chuan, nimin khan MNF President-in MNF zawm thar Thenzawlah mi 119 leh Serchhipah mi 252 a lawm lût niin an tarlang.