Mizoramin ramri ngaihsak lo sorkar A nei hi a vanduaithlak - ZPM Ṭhalai
ZPM Ṭhalai chuan, Assam sorkarin ramria cheng mipuite a ngaihven em em laiin Mizoram sorkarin a ngaihthah hle thung tih sawiin, Mizoramin ramri ngaihsak lo sorkar a nei chu vanduaithlak an tih thu an tarlang.
Nimin khan an hruaitute'n Phainuam, Saihapui-V leh Vairengtea ramri vengtu Mizoram police-te an tlawh tih sawiin ZPM Ṭhalai chuan, "Ramria Mizoram sorkar hmalakna kan duhkhawp lo a, a lungawithlak loh hle niin kan hria. Ramria cheng mipuite Mizoram sorkarin nasa taka a ngaihthah laiin, Assam lamin an ngaihtuah em em thung," an ti.
ZPM ṭhalaite chuan, "Ramria venhimna hna thawktu Mizoram police-te awmna chu venhimna hna thawhna hmun pawh ni lo, police-te tan pawh inhremna ang khawp hiala hrehawm a ni hi a lungchhiatthlâk kan ti. Ramri enkawlna tur sum hi Home department-ah khawh lût loin, financial air-lock a awm em ni," an ti a; infiamna (sports) ruhrel man to taka siam aiin, ramri him tura ruahmanna ṭha neih Mizoramin a mamawh zawk thu an sawi.
Ramri vengtu sipaite'n tui in tur thianghlim, tawm hulna leh mamawh dang tlakchham tam tak an nei tih sawiin ZPM ṭhalaite chuan, "MLA bial khata by-election neih tur ngaihsak zawktu sorkar kan nei hi a vanduaithlâk. MNF hian ramria kan himna aiin an party himna ringawt an ngaihsak zawkzia a lang chiang hle a ni," an ti a; Zoramthanga kaihhruai sorkar chu Serchhip by-election atana rilru leh thâ an sèn zatve tal pawh ramri leh ramri venghimtu police-te tan seng ve turin an chah.
ZPM Ṭhalai hruaitute hian Vairengtea Mizoram police duty-te hnenah tui tihthianghlimna (water filter) an pe nghal a ni.