KHAWTHLIR
Mizo dah turin ngen
Higher & Technical Education director atana Nazuk Kumar, IAS ruat chungchangah Mizo Students’ Union hruaitute chuan nimin khan deputy chief minister Tawnluia an hmu a, HTE director atan Mizo dah tura ngenna an thlen.
Capping and Lamp
Lighting Ceremony
Blessino Nursing School, Maubawk chuan nimin khan an hmunah Capping and Lamp Lighting Ceremony vawi hnihna an hmang a, Rajya Sabha MP K Vanlalvena'n a hmanpui. MP chuan, nurse-te'n mi lian leh tê thliar loa damlo an enkawl a ṭul thu a sawi. Blessino Nursing School hi kum 2019-a din a ni a, Mizoram Nursing Council exam an hmachhawn hmasak berah zirlaite an pass vek a ni.
MZU UG result
Mizoram University chuan nimin khan under graduate odd semester (first, third & fifth) exam result a tichhuak a, zirlaite chu MZU website https://mzuegov.in/onlineresult ah en turin an chah.
In sak sak
Chhiahtlang South VC leh Chhiahtlang Kawn Veng VC-te chuan nimin aṭang khan an huamchhunga chhungkaw harsa pakhat chenna in tur an sak sak. In sakna atan hian Chhiahtlang South VC te hian State Finance Commission Grant (SFC) aṭanga hnathawhna tur sum an hmuh an hman bante hmang a ni dawn a, a chung tur rangva bialtu MLA Lalrinawma'n a tum ang.
Lirthei tlan khap
Traffic SP chuan thupek chhuahin, zanin dar 8 aṭanga naktuk zing dar 4 thleng Upper Republic venga Phunthanga Road, Ramsangliana in leh Governor south gate inkar kawng thawm ṭhat hna an thawh dawn avangin, hna thawh chhungin kawngah lirthei tlân phal a nih loh thu a tarlang.
ICU-ah 2 enkawl
State Referral Hospital-ah Covid-19 vei mi 14 awm mekin, an zinga pahnih chu ICU-ah enkawl an ni. SRH-ZMC Bulletin tarlan danin, ICU-a awm mi pahnihte chu oxygen hmanga enkawl ve ve an ni a; mi dang 12 chu Isolation ward-ah awmin, harsatna lian tham an nei lo. Mi 14 zingah hian kum 60 chung lam pahnih leh naupang kum 14 hnuai lam pathum an tel a ni.